Municipal Election: सात वर्षांपासून प्रलंबित असलेल्या महापालिका निवडणुकांकडे सर्वांची नजर लागली आहे. पण लवकरच निवडणुकांच बिगुल वाजण्याची शक्यता आहे. १५ डिसेंबरनंतर कोणत्याही क्षणी निवडणूक आचारसंहिता लागू होऊ शकते आणि नववर्षाच्या पहिल्या पंधरवड्यात (१४ किंवा १५ जानेवारी) मतदान होण्याची दाट शक्यता आहे. सर्वोच्च न्यायालयाच्या “जानेवारीअखेर निवडणुका” या डेडलाइनमुळे निवडणूक आयोगाने वेगवान तयारी सुरू केली आहे. सूत्रांच्या मते १५ डिसेंबर रोजी राज्यात शंभरहून अधिक मोठ्या प्रकल्पांचे भूमिपूजन-लोकार्पण होणार आहे. त्याच दिवशी किंवा लगेच दुसऱ्या दिवशी आचारसंहितेची घोषणा होईल.
प्रभागनिहाय मतदारयाद्या १५ डिसेंबरला जाहीर होताच निवडणूक कार्यक्रम जाहीर करण्याचा मार्ग मोकळा होईल. २९ पैकी नागपूर-चंद्रपूर वगळता २७ महापालिकांत निवडणुका घेण्यास हरकत नाही, असे आयोगाने स्पष्ट केले आहे. २०१७ च्या निवडणुकीत घोषणा आणि मतदान यात दोन महिन्यांचा कालावधी होता, पण यंदा सर्वोच्च न्यायालयाच्या दबावामुळे केवळ ३० दिवसांत संपूर्ण प्रक्रिया पूर्ण केली जाईल. बुधवार किंवा गुरुवार हे मतदानाचे दिवस असण्याची शक्यता आहे, कारण सोमवार-शुक्रवारला सुट्ट्या जोडल्या जातात आणि मतदान टक्का कमी होतो. १४ किंवा १५ जानेवारीला मतदान होऊ शकते.
मुंबई, पुणे, ठाणे या सर्वांत महत्त्वाच्या महापालिकांच्या निवडणुका एकत्र होणार असल्याने राजकीय वातावरण तापले आहे. भाजप-शिवसेना (शिंदे)-अजित पवार गट विरुद्ध ठाकरे गट-काँग्रेस-राष्ट्रवादी (शरद पवार) असा थेट सामना रंगणार आहे. मुंबई महापालिकेची लढत तर देशपातळीवर लक्षवेधी ठरणार आहे.
निवडणूक आयोगाने वॉर्डनिहाय मतदारयाद्या २७ डिसेंबरपर्यंत प्रदर्शित करण्याचे नियोजन केले आहे. नगरपरिषद-नगरपंचायतींच्या निवडणुका आटोपल्यानंतर लगेच महापालिकांचा क्रम लागणार आहे. जिल्हा परिषदांच्या निवडणुका शेवटी होतील की मध्येच, याबाबत अंतिम निर्णय लवकरच होईल. पुणेकरांसह राज्यातील नागरिकांना “आपले शहर, आपले सरकार” निवडण्याची संधी जानेवारीत मिळणार हे निश्चित!
