Pune Crime: अनैतिक संबंधांच्या संशयावरून पुण्यात एका ३५ वर्षीय महिलेची निर्घृण हत्या करण्यात आली आहे. विशेष म्हणजे, या गुन्ह्यात भाजप विधी शाखेचा शहराध्यक्ष एडव्होकेट संजय सावंत याच्यासह त्याची पत्नी आणि अल्पवयीन मुलीला पोलिसांनी बेड्या ठोकल्या आहेत. पुनम दिनेश मुन असे मृत महिलेचे नाव असून, त्या सावंत याच्या कार्यालयात मागील साडेतीन वर्षांपासून सचिव (सेक्रेटरी) म्हणून कार्यरत होत्या.
नेमकं प्रकरण काय?
मुंढवा भागात एडव्होकेट संजय सावंत यांचे कार्यालय आहे. पुनम मुन आणि संजय सावंत यांच्यात प्रेमसंबंध असल्याचा संशय सावंतची पत्नी स्वाती हिला होता. याच कारणावरून त्यांच्यात वारंवार खटके उडत होते. गुरुवारी (१६ एप्रिल) दुपारी कार्यालयात हा वाद विकोपाला गेला. यावेळी संजय सावंत, त्याची पत्नी आणि अल्पवयीन मुलगी या तिघांनी मिळून पुनम यांना बेदम मारहाण करण्यास सुरुवात केली.
अत्याचार आणि हत्येचा थरार
मिळालेल्या माहितीनुसार, आरोपींनी पुनम यांचे पाय दोरीने बांधले आणि बॅटने त्यांना जबर मारहाण केली. या हल्ल्यात पुनम यांचा जागीच मृत्यू झाला. त्यानंतर पुरावा नष्ट करण्याच्या उद्देशाने आरोपींनी त्यांचा मृतदेह एका पोत्यात भरला आणि ते पोते ऑफिसमध्येच लपवून ठेवले. दुसऱ्या दिवशी संधी मिळताच मृतदेहाची विल्हेवाट लावण्याचा त्यांचा कट होता.
पतीनेच उघडकीस आणले हत्याकांड
पुनम रात्री उशिरापर्यंत घरी न परतल्याने त्यांचे पती दिनेश मुन यांनी शोधाशोध सुरू केली. त्यांनी संजय सावंतला फोन केला असता, त्याने उडवाउडवीची उत्तरे दिली. अखेर रात्री ११ वाजता कुटुंबीयांनी पोलिसांत तक्रार दाखल केली. दुसऱ्या दिवशी सकाळी दिनेश मुन संशयावरून थेट सावंतच्या ऑफिसमध्ये पोहोचले. तिथे त्यांना एक संशयास्पद पोते दिसले. ते उघडले असता, त्यांना स्वतःच्या पत्नीचा मृतदेह आढळून आला. या घटनेने पुणे शहरात मोठी खळबळ माजली आहे. पोलिसांनी तातडीने कारवाई करत तिन्ही आरोपींना ताब्यात घेतले असून पुढील तपास सुरू आहे.
