पुणे : पुण्यात येत्या जानेवारीमध्ये होणाऱ्या महापालिका निवडणुकीच्या पार्श्वभूमीवर राजकीय घडामोडींना वेग आला आहे. शरद पवार आणि अजित पवार यांच्या राष्ट्रवादी काँग्रेसच्या दोन्ही गटांनी पुणे महापालिका निवडणूक एकत्र लढवण्याच्या चर्चा सुरू केल्याने महाविकास आघाडीत फूट पडली आहे. या पार्श्वभूमीवर काँग्रेस आणि उद्धव ठाकरे यांच्या शिवसेना (उबाठा) यांच्यात जागा वाटपाच्या बोलण्या सुरू झाल्या आहेत.
काल (२५ डिसेंबर) काँग्रेसने शिवसेना (उबाठा) ला पुणे महापालिकेत एकत्र लढण्याचा औपचारिक प्रस्ताव पाठवला आहे. दोन्ही पक्षांच्या नेत्यांमध्ये जागा वाटपावर चर्चा सुरू असून, शुक्रवारी याबाबतची बैठक होणार आहे. पुणे महापालिकेत एकूण ४१ प्रभाग आणि १६५ जागा आहेत. सूत्रांच्या मते, जागा वाटपात शिवसेना (उबाठा)च्या काही जागा राज ठाकरे यांच्या महाराष्ट्र नवनिर्माण सेनेला देण्याची शक्यता आहे.
शरद पवार गटाच्या काही नेत्यांनी अजित पवार गटासोबत पुणे आणि पिंपरी-चिंचवडमध्ये एकत्र येण्याबाबत तत्त्वतः सहमती दर्शवली आहे. मात्र, सुप्रिया सुळे यांनी याबाबत अधिकृत प्रस्ताव नसल्याचे स्पष्ट केले. या घडामोडींमुळे काँग्रेस आणि शिवसेना (उबाठा)ने स्वतंत्रपणे नवी आघाडी तयार करण्याचा निर्णय घेतला आहे.
मनसेला मात्र पुण्यात सामावून घेण्याबाबत अद्याप कोणताही विचार नसल्याचे काँग्रेस नेत्यांनी सांगितले. या बदलत्या राजकीय समीकरणांमुळे पुणे महापालिका निवडणूक आणखी रंजक होणार आहे. भाजप आणि शिंदे गट एकत्र लढण्याच्या तयारीत असताना विरोधकांच्या फुटीमुळे महायुतीला फायदा होण्याची शक्यता व्यक्त होत आहे.
