Bandu Andekar : पुणे महानगरपालिका निवडणुकीच्या रणधुमाळीत एका धक्कादायक दृश्याने सर्वांचे लक्ष वेधून घेतले. आंदेकर टोळीचा म्होरक्या बंडू आंदेकर याने हातात बेड्या आणि तोंडावर स्कार्फ असलेल्या अवस्थेत पोलीस बंदोबस्तात आपला उमेदवारी अर्ज दाखल केला. विशेष म्हणजे, यावेळी आंदेकर कुटुंबातील इतर सदस्यांनीही निवडणुकीच्या रिंगणात उडी घेतली आहे.
नेकी का काम, आंदेकर का नाम!
अर्ज भरण्यासाठी पोलीस व्हॅनमधून उतरताच बंडू आंदेकरने जोरदार घोषणाबाजी केली. “मी उमेदवार आहे, दरोडेखोर नाही,” असे म्हणत त्याने मतदारांना साद घातली. ‘आंदेकरांना मत म्हणजे विकासाला मत’, “वनराज आंदेकर जिंदाबाद” अशा घोषणांनी परिसर दणाणून गेला होता. बंडू आंदेकर यांच्यासोबतच लक्ष्मी आंदेकर आणि सोनाली आंदेकर यांनीही आपले उमेदवारी अर्ज सादर केले आहेत.
हेही वाचा – बंडू आंदेकर टोळीतील आणखी एका गुंडाला ठोकल्या बेड्या; स्वारगेट परिसरात सापळा रचून केली अटक
कोणत्या पक्षाकडून उमेदवारी?
बंडू आंदेकर नेमक्या कोणत्या पक्षाकडून लढणार, याबाबत राजकीय वर्तुळात मोठी चर्चा सुरू आहे. राष्ट्रवादी काँग्रेसचे शहराध्यक्ष सुभाष जगताप यांनी यापूर्वी लक्ष्मी आणि बंडू आंदेकर यांना उमेदवारी देण्याचे संकेत दिले होते. बंडू आंदेकर यांचा मुलगा स्वर्गीय वनराज आंदेकर हे अविभाजित राष्ट्रवादी काँग्रेसमध्ये नगरसेवक होते. आता त्याच राजकीय वारशावर आंदेकर कुटुंब पुन्हा दावा करत असल्याचे चित्र आहे.
पोलिस व्हॅनमधून ‘एन्ट्री’ची चर्चा
गुन्हेगारी पार्श्वभूमी असलेल्या व्यक्तीने पोलीस कोठडीत असताना अशा प्रकारे घोषणाबाजी करत अर्ज भरल्यामुळे पुण्याच्या राजकारणात गुन्हेगारीकरणाचा मुद्दा पुन्हा एकदा चर्चेत आला आहे. तथापी, ‘लोकशाहीत मला कसं वागवलं जातंय,’ असा सवाल करत आंदेकरने यावेळी सहानुभूती मिळवण्याचाही प्रयत्न केला.
