पुणे : पुणे जिल्ह्यातील जुन्नर तालुक्यात अहिल्यानगर-कल्याण महामार्गावर ओतूर येथे गुरुवारी (२ जानेवारी) सकाळी शेतमजुरांना नेणाऱ्या पिकअप वाहन आणि ट्रकची समोरासमोर जोरदार धडक होऊन भीषण अपघात झाला. या अपघातात दोन महिलांचा जागीच मृत्यू झाला, तर १५ ते २० जण गंभीर जखमी झाले. जखमींना तात्काळ ओतूर आणि आळेफाटा येथील खासगी रुग्णालयात दाखल करण्यात आले आहे.
अपघात सकाळच्या सुमारास घडला. शेतमजुरांनी भरलेले पिकअप वाहन आणि समोरून येणारा ट्रक यांची जोरदार टक्कर झाली. धडकेने दोन्ही वाहनांचा चक्काचूर झाला. अपघात इतका भीषण होता की, घटनास्थळी एकच गोंधळ उडाला. मृत्यू झालेल्या दोन्ही महिला शेतमजूर होत्या. मृतांची ओळख पटवण्याचे काम सुरू आहे.
घटनेची माहिती मिळताच जुन्नर पोलीस आणि बचाव पथक घटनास्थळी दाखल झाले. जखमींना बाहेर काढून रुग्णालयात हलवण्यात आले. अपघातामुळे काही काळ महामार्गावर वाहतूक ठप्प झाली होती. परिसरात हळहळ व्यक्त केली जात आहे.
पोलिसांनी घटनेची नोंद घेऊन तपास सुरू केला आहे. अपघाताचे नेमके कारण अद्याप स्पष्ट झाले नाही, मात्र वेग आणि निष्काळजीपणा असण्याची शक्यता वर्तवली जात आहे. शेतमजुरांच्या वाहतुकीत सुरक्षेच्या उपाययोजनांचा अभाव पुन्हा एकदा समोर आला आहे.
