Beed Crime: जिल्ह्याचे मुख्यालय असलेल्या बीड शहरात कायदा-सुव्यवस्थेचे धिंडवडे काढणारी एक धक्कादायक घटना घडली आहे. शहरातील अंकुश नगर भागात नगरपरिषदेचे काम करत असताना एका मजुराची गोळी झाडून निर्घृण हत्या करण्यात आली. हर्षद शिंदे असे मृत मजुराचे नाव असून, या घटनेमुळे संपूर्ण शहरात दहशतीचे वातावरण पसरले आहे.
नेमकं काय घडलं?
मिळालेल्या माहितीनुसार, अंकुश नगर परिसरात नगरपरिषदेच्या वतीने खड्डा खोदण्याचे काम सुरू होते. हर्षद शिंदे हे तिथे रोजंदारीवर काम करत होते. दरम्यान, अचानक गोळीबाराचा आवाज झाला आणि हर्षद रक्ताच्या थारोळ्यात कोसळले. जुन्या वादातून हा प्रकार घडल्याचा प्राथमिक संशय व्यक्त केला जात आहे.
हेही वाचा – Solapur Crime: एकतर्फी प्रेमाचा रक्तरंजित शेवट! सोलापूरच्या स्नेहाची अक्कलकोटमध्ये हत्या
आरोपी फरार, पोलिसांची पथके रवाना
गोळीबार केल्यानंतर संशयित आरोपी विशाल सूर्यवंशी हा घटनास्थळावरून पळ काढण्यात यशस्वी झाला. घटनेची माहिती मिळताच शिवाजीनगर पोलीस ठाण्याचे पथक घटनास्थळी दाखल झाले. पोलिसांनी परिसराची नाकेबंदी केली असून पंचनामा पूर्ण केला आहे. मृतदेह उत्तरीय तपासणीसाठी जिल्हा रुग्णालयात पाठवण्यात आला आहे.
बीडमध्ये दहशतीचे सावट
भरवस्तीत आणि दिवसाढवळ्या झालेल्या या खुनामुळे नागरिकांमध्ये भीती पसरली आहे. गुन्हेगारांना पोलिसांचा धाक उरला आहे की नाही, असा सवाल या घटनेमुळे उपस्थित होत आहे. आरोपीच्या शोधासाठी पोलिसांनी विशेष तपास पथके तयार केली असून ठिकठिकाणी शोधमोहीम राबवली जात आहे.
