BMC Election 2026: मुंबई महानगरपालिका निवडणुकीच्या रणधुमाळीत एक संतापजनक प्रकार समोर आला आहे. कुर्ला परिसरातील वॉर्ड क्रमांक १५७ मधील भाजप उमेदवार आशाताई तायडे यांच्या प्रचार सभेत चक्क महिलांच्या अश्लील डान्सचे आयोजन करण्यात आले होते. विशेष म्हणजे, ज्या ठिकाणी हा नाचगाण्याचा कार्यक्रम झाला, तिथे छत्रपती शिवाजी महाराज आणि डॉ. बाबासाहेब आंबेडकर यांच्या प्रतिमा लावण्यात आल्या होत्या. या कृत्यामुळे आता राजकीय वातावरण चांगलेच तापले आहे.
गर्दी खेचण्यासाठी नाचगाण्याचा ‘फंडा’
मुळात हा कार्यक्रम ज्येष्ठ नागरिकांना ब्लँकेट वाटप करण्यासाठी आयोजित करण्यात आला होता. मात्र, केवळ समाजसेवा न करता मतदारांना आकर्षित करण्यासाठी आणि गर्दी जमवण्यासाठी तिथे गाण्यांच्या तालावर महिलांना नाचवण्यात आले. सोशल मीडियावर या घटनेचा व्हिडिओ वाऱ्यासारखा पसरला असून, महापुरुषांच्या प्रतिमेसमोर अशा प्रकारे कृत्य करणे ही महाराष्ट्राची संस्कृती आहे का? असा सवाल आता सामान्य नागरिक विचारत आहेत.
‘सिद्धिविनायक ट्रस्ट’च्या कोषाध्यक्षांवर निशाणा
शिवसेना ठाकरे गटाचे नेते अखिल चित्रे यांनी हा व्हिडिओ ट्विट करत भाजपवर टीकेचे आसूड ओढले आहेत. त्यांनी थेट भाजपचे मुंबई अध्यक्ष आशिष शेलार यांना सवाल विचारला आहे. या कार्यक्रमाचे आयोजक पवन त्रिपाठी आहेत, ज्यांना भाजपने सिद्धिविनायक ट्रस्टचे कोषाध्यक्ष पद दिले आहे. पवित्र मंदिरांवर अशा लोकांची नेमणूक करताना भाजपला लाज वाटली पाहिजे, अशा शब्दांत चित्रे यांनी आपला संताप व्यक्त केला.
पाकिस्तानचा डोनाल्ड डक; अमित साटम!
– अखिल चित्रे, शिवसेना राज्यसंघटक@akhil1485 pic.twitter.com/1Nx6lyXO2Y
— Shivsena UBT Communication (@ShivsenaUBTComm) January 5, 2026
बदललेली राजकीय समीकरणे अन् भाजपची अडचण
मुंबईत यंदाची निवडणूक अत्यंत अटीतटीची मानली जात आहे. त्यातच उद्धव आणि राज ठाकरे हे दोन्ही बंधू एकत्र आल्याने ठाकरे गटाचा उत्साह द्विगुणित झाला आहे. या युतीमुळे महायुतीसमोर (भाजप-शिवसेना) मोठे आव्हान उभे ठाकले असताना, अशा वादांमुळे भाजपच्या अडचणीत वाढ होण्याची शक्यता वर्तवली जात आहे. मतदारांना आमिष दाखवण्यासाठी आणि महापुरुषांचा अनादर करण्यासाठी भाजपने हा खालचा स्तर गाठल्याचा आरोप विरोधकांकडून केला जात आहे.
