Pune News: पुण्यामध्ये सॉफ्टवेअर इंजिनीअरने आत्महत्या केल्याची धक्कादायक घटना घडली. या इंजिनीअरने कंपनीमधील टॉयलेटमध्ये गळफास घेत आयुष्य संपवलं. आत्महत्या करण्यापूर्वी या इंजिनीअरने आईला मोबाइलवरून मेसेज केला होता. या घटनेमुळे टीसीएस कंपनीत खळबळ उडाली. हिंजवडी पोलिसांनी घटनास्थळी धाव घेत तरुणाचा मृतेदह ताब्यात घेत शवविच्छेदनासाठी रुग्णालयात पाठवला.
टीसीएस कंपनीत
मिळालेल्या माहितीनुसार, हिंजवडी आईटी पार्कमधील टीसीएस कंपनीत ही धक्कादायक घटना घडली. सुजल विनोद ओसवाल ( २४ वर्षे) या सॉफ्टवेअर इंजिनीअरने आत्महत्या केली. तो पुण्यातील वानवडी परिसरामध्ये राहायला होता. हिंजवडीतील टीसीएस कंपनीमध्ये तो कामाला होता. कंपनीच्या टॉयलेटमध्ये जाऊन लॅपटॉपच्या चार्जिंग वयारने गळफास घेत त्याने आत्महत्या केली.
बेटिंगमध्ये मोठं नुकसान
सुजल विनोद ओसवालने बेटिंगमध्ये मोठं नुकसान झाल्याच्या कारणावरून आत्महत्या केल्याचे पोलिस तपासातून उघड झाले. त्याने आईला जीवाचे बरे वाईट करून घेतो असा मेसेज करून आत्महत्या केली. त्याने आत्महत्या केल्यामुळे कंपनीत एकच खळबळ उडाली. कंपनीने हिंजवडी पोलिसांना घटनेची माहिती दिली. पोलिसांनी घटनास्थळी धाव घेत सुजलचा मृतदेह ताब्यात घेतला आणि शवविच्छेदनासाठी रुग्णालयात पाठवला. या प्रकरणी हिंजवडी पोलिसांनी आकस्मित मृत्यूची नोंद करत तपास सुरू केला.
