Dry Day: उद्या १५ जानेवारी रोजी होणाऱ्या पुणे आणि पिंपरी-चिंचवड महापालिका निवडणुकीसाठी प्रशासकीय यंत्रणा सज्ज झाली आहे. मतदानाची प्रक्रिया शांततेत आणि पारदर्शक वातावरणात पार पडावी, यासाठी जिल्हाधिकाऱ्यांनी शहरात कडक निर्बंध लागू केले असून मतदारांच्या सोयीसाठी विशेष सवलतींची घोषणा केली आहे.
मद्यविक्रीवर कडक बंदी (Dry Day)
निवडणुकीच्या काळात कायदा व सुव्यवस्था राखण्यासाठी उत्पादन शुल्क विभागाने महत्त्वाचा निर्णय घेतला आहे. आज (बुधवार) पासून ते १६ जानेवारी (निकाल लागेपर्यंत) सलग तीन दिवस शहरात मद्यविक्री पूर्णपणे बंद राहील. सर्व घाऊक व किरकोळ मद्यविक्री दुकाने, परमिट रूम, बिअर बार आणि देशी दारूची दुकाने या आदेशांतर्गत सील करण्यात येणार आहेत. मद्याच्या माध्यमातून मतदारांवर प्रभाव टाकण्याचे प्रकार रोखण्यासाठी ही पावले उचलण्यात आली आहेत.
हेही वाचा – BMC Election 2026: आशियातील सर्वात श्रीमंत मुंबई महानगरपालिकेचा निकाल लांबणीवर! काय आहे यामागचं नेमकं कारण ?
कामगारांना मतदानासाठी ‘पेड लीव्ह’
मतदानाची टक्केवारी वाढावी यासाठी कामगार विभागाने सर्व खासगी आस्थापनांना कडक सूचना दिल्या आहेत. पुण्यातील सर्व दुकाने, कारखाने आणि आयटी कंपन्यांनी कर्मचाऱ्यांना गुरुवारी भरपगारी सुट्टी देणे अनिवार्य आहे. ज्या ठिकाणी पूर्ण दिवस सुट्टी देणे शक्य नाही, तिथे कर्मचाऱ्यांना मतदानासाठी किमान २ ते ३ तासांची सवलत द्यावी लागेल. जर एखाद्या कंपनीने सुट्टी नाकारली, तर कर्मचारी कामगार आयुक्तालयाकडे ई-मेलद्वारे तक्रार नोंदवू शकतात.
दरम्यान, पुण्यातील वाढते धूलिकण आणि प्रदूषण लक्षात घेता महापालिकेने मतदारांच्या आरोग्याची काळजी घेतली आहे. मतदान केंद्रांच्या परिसरात धूळ उडू नये, यासाठी रस्ते स्वच्छ करून ‘मिस्ट मशीन’ द्वारे पाण्याची सूक्ष्म फवारणी केली जाणार आहे. यामुळे ज्येष्ठ नागरिक आणि रुग्णांना मतदानासाठी येताना प्रदूषणाचा त्रास होणार नाही.
