Khambatki Ghat Tunnel: पुणे-सातारा राष्ट्रीय महामार्गावरून प्रवास करणाऱ्या प्रवाशांसाठी एक मोठी आणि दिलासादायक बातमी आहे. प्रवाशांच्या जिवावर बेतणारे खंबाटकी घाटातील धोकादायक ‘S’ आकाराचे वळण आता इतिहास जमा होणार आहे. या घाटातील वाहतूक कोंडी आणि अपघातांवर कायमस्वरूपी तोडगा म्हणून उभारण्यात आलेल्या दोन नव्या दुहेरी बोगद्यांपैकी एका बाजूच्या बोगद्याची चाचणी यशस्वी झाली असून, तो वाहतुकीसाठी खुला करण्यात आला आहे.
खासदार मुरलीधर मोहोळ यांची मोठी घोषणा
पुण्याचे खासदार मुरलीधर मोहोळ यांनी या महत्त्वाकांक्षी प्रकल्पाबाबत माहिती देताना सांगितले की, खंबाटकी घाटातील नव्या बोगद्याच्या डाव्या बाजूची मार्गिका चाचणी तत्त्वावर सुरू झाली आहे. यामुळे प्रवाशांचा मोठा वेळ वाचणार आहे. जिथे घाट पार करण्यासाठी पूर्वी ४५ मिनिटे लागायची, तिथे आता अवघ्या ७ मिनिटांत हा टप्पा पार करता येईल.
प्रकल्पाची वैशिष्ट्ये आणि सद्यस्थिती
- बोगद्याची लांबी: हा बोगदा १.३ किमी लांबीचा असून, सोबतीला १.२ किमी लांबीचा भव्य व्हायाडक्ट (उड्डाणपूल) उभारण्यात आला आहे.
- तीन पदरी मार्ग: हे दोन्ही बोगदे तीन पदरी (3-Lane) असून, त्यामुळे मोठ्या वाहनांनाही विनाअडथळा प्रवास करता येईल.
- कामाची प्रगती: प्रकल्पाचे सुमारे ९० टक्के काम पूर्ण झाले आहे. डाव्या बाजूचा बोगदा सुरू झाला असून, उजव्या बाजूची ट्यूब जून २०२६ पर्यंत पूर्ण करण्याचे उद्दिष्ट ठेवण्यात आले आहे.
अपघातांचे सावट दूर होणार
खंबाटकी घाटातील ‘एस’ आकाराचे वळण अत्यंत धोकादायक मानले जाते. या ठिकाणी भीषण अपघातांचे प्रमाण मोठे होते आणि वारंवार होणाऱ्या वाहतूक कोंडीमुळे प्रवाशांचे तासनतास वाया जात होते. नव्या बोगद्यामुळे हा घाट मार्ग पूर्णपणे वगळला जाणार असल्याने प्रवास केवळ वेगवानच नाही, तर सुरक्षितही होणार आहे. फेब्रुवारी २०१९ मध्ये सुरू झालेले हे काम कोरोना संकटामुळे लांबणीवर पडले होते, मात्र आता ते अंतिम टप्प्यात आले आहे.
