Pune Crime: सायबर भामट्यांनी आता ज्येष्ठ नागरिकांना लक्ष्य करण्यास सुरुवात केली असून, चिंचवडमध्ये एक खळबळजनक घटना उघडकीस आली आहे. ‘मनी लाँड्रिंग’ प्रकरणात अडकवण्याची आणि अटकेची धमकी देऊन एका ७७ वर्षीय वृद्धाची तब्बल १ कोटी रुपयांची फसवणूक करण्यात आली आहे. याप्रकरणी पिंपरी-चिंचवड सायबर पोलिसांनी अज्ञात मोबाईल क्रमांक आणि बँक खातेधारकांविरुद्ध गुन्हा दाखल केला आहे.
फसवणुकीचा ‘भयंकर’ सापळा
चिंचवडमधील शिवाजी पार्क परिसरात राहणारे अशोक कृष्णा सराफ यांना भामट्यांनी नियोजनबद्ध पद्धतीने जाळ्यात ओढले. सुरुवातीला टेलिफोन विभागाचे कर्मचारी, नंतर सर्व्हिलन्स ऑफिसर आणि शेवटी सीबीआय अधिकारी असल्याची बतावणी करून आरोपींनी सराफ यांच्याशी संपर्क साधला. तुमचे कॅनरा बँकेचे खाते ‘नरेश गोयल’ यांच्यावरील ईडी (ED) कारवाईशी संबंधित मनी लाँड्रिंगसाठी वापरले गेले आहे, असा खोटा दावा करत त्यांना अटकेची भीती दाखवण्यात आली. आरोपींनी सराफ यांना ‘डिजिटल अरेस्ट’ करून त्यांच्यावर प्रचंड मानसिक दबाव निर्माण केला.
तपासणीच्या नावाखाली १ कोटी लंपास
बँक खात्यातील रकमेची ‘लीगल व्हेरिफिकेशन’ (कायदेशीर वैधता तपासणी) करावी लागेल, असे सांगून भामट्यांनी सराफ यांचा विश्वास संपादन केला. ही प्रक्रिया पूर्ण झाल्यावर सर्व पैसे परत मिळतील, असे आश्वासन देत त्यांना १ कोटी रुपये वेगवेगळ्या खात्यांवर पाठवण्यास भाग पाडले. सराफ यांनी आपल्या आयुष्याची पुंजी आणि म्युच्युअल फंडातील पैसे ट्रान्सफर केल्यानंतर आरोपींनी आपले संपर्क क्रमांक बंद केले. फसवणूक झाल्याचे लक्षात येताच सराफ यांनी पोलिसांत धाव घेतली.
पोलिसांची कारवाई
पिंपरी-चिंचवड सायबर पोलिसांनी याप्रकरणी भारतीय न्याय संहिता (BNS) आणि माहिती तंत्रज्ञान कायद्याच्या विविध कलमान्वये (६६ सी, ६६ डी) गुन्हा नोंदवला आहे. पोलीस निरीक्षक नाळे या प्रकरणाचा सखोल तपास करत असून संशयित बँक खात्यांची माहिती गोळा केली जात आहे.
