पुणे : जुन्नर येथे राष्ट्रवादी काँग्रेसच्या एकत्रीकरणाचा पहिला राजकीय संकेत मिळाल्याचं चित्र दिसत आहे. दिवंगत नेते अजित पवार यांच्या निधनानंतर अवघ्या पंधरा दिवसांत पुणे जिल्ह्यातील राजकारणात महत्त्वाची घडामोड घडली आहे. माजी आमदार अतुल बेनके यांनी उपमुख्यमंत्री सुनेत्रा पवार यांच्या उपस्थितीत खासदार अमोल कोल्हे यांच्यासोबत पुढे एकत्रित राजकीय वाटचाल करण्याची घोषणा केली.
दरम्यान, बेनके यांनी जुन्नरमध्ये राष्ट्रवादीच्या एकत्रीकरणाचा मुद्दा पुढे आणताच काही स्थानिक नेत्यांनी मात्र ही घडामोड स्थानिक राजकीय समीकरणांमुळे झाल्याचं सांगितलं.
यापूर्वी जिल्हा परिषद निवडणुकीत दोन्ही राष्ट्रवादी गटांनी एकत्र येत निवडणूक लढवण्याचा निर्णय घेतला होता. या एकजुटीचा फायदा झाल्याचं निकालातून स्पष्ट झालं. पुणे जिल्ह्यातील ७३ पैकी तब्बल ५१ जागांवर विजय मिळवत राष्ट्रवादीने जोरदार कामगिरी केली. जुन्नर तालुक्यातील ८ गटांपैकी ४ जागा राष्ट्रवादीच्या गटाला, तर उर्वरित जागा इतर पक्षांकडे गेल्या.
अजित पवारांच्या निधनानंतर राज्यभर राष्ट्रवादीच्या संभाव्य विलिनीकरणाची चर्चा रंगली असताना, जुन्नरमधील हा निर्णय पुढील मोठ्या राजकीय बदलाची सुरुवात ठरणार का, याकडे संपूर्ण राज्याचं लक्ष लागलं आहे.
