Ladki Bahin Yojana: राज्य सरकारची अत्यंत लोकप्रिय ठरलेली ‘मुख्यमंत्री माझी लाडकी बहीण योजना’ आता एका महत्त्वाच्या टप्प्यावर आली आहे. फेब्रुवारी २०२६ चा १५०० रुपयांचा हप्ता पात्र महिलांच्या खात्यात जमा करण्यासाठी सरकारने हालचाली तीव्र केल्या असून, निधी वितरणाला प्रशासकीय मान्यता दिली आहे.
२७७ कोटींचा निधी मंजूर; हप्ता कधी येणार?
फेब्रुवारी महिन्याचा हप्ता लवकरच भगिनींच्या बँक खात्यात वळता करण्यासाठी सामाजिक न्याय विभागाने २७७ कोटी रुपये महिला व बाल विकास विभागाकडे वर्ग करण्याचा निर्णय घेतला आहे. जानेवारीचा हप्ता २३ फेब्रुवारीला मिळाला होता, त्यामुळे आता फेब्रुवारीचा प्रलंबित हप्ता येत्या काही दिवसांतच जमा होण्याची दाट शक्यता आहे.
३१ मार्चची डेडलाईन विसरू नका
योजनेचा लाभ सातत्याने मिळवण्यासाठी ई-केवायसी (e-KYC) पूर्ण करणे अनिवार्य आहे. मात्र, अनेक महिलांनी प्रक्रियेदरम्यान चुकीचे पर्याय निवडल्याने त्यांचे हप्ते तांत्रिक अडचणीत सापडले आहेत. सरकारने ही चूक सुधारण्यासाठी ३१ मार्च २०२६ पर्यंत वेळ दिली आहे. आता हातात केवळ ६ दिवस उरले आहेत. जर या मुदतीत ई-केवायसी दुरुस्ती केली नाही, तर तुमचा पुढचा लाभ कायमचा बंद होऊ शकतो.
लाभार्थींच्या संख्येत घट?
ई-केवायसी प्रक्रिया वेळेत पूर्ण न केल्यामुळे लाभार्थी महिलांच्या एकूण संख्येत मोठी घट झाल्याचे समोर आले आहे. ज्या महिलांचे वार्षिक उत्पन्न २.५ लाखांपेक्षा कमी आहे आणि ज्या पात्र आहेत, त्यांनी तातडीने आपल्या मोबाईल किंवा नजीकच्या संगणक केंद्रावरून आपली माहिती अपडेट करणे आवश्यक आहे.
