Ashok Kharat Case: स्वयंघोषित आध्यात्मिक गुरू अशोक खरात याच्या काळ्या कारनाम्यांचे धागेदोरे आता प्रशासकीय यंत्रणेपर्यंत पोहोचले आहेत. एका आयएएस (IAS) अधिकाऱ्याचे नाव चर्चेत आल्यानंतर, आता राज्य पोलीस दलातील दोन वरिष्ठ महिला अधिकारी खरातच्या संपर्कात असल्याची धक्कादायक माहिती सूत्रांकडून मिळत आहे. यामुळे पोलीस दलात मोठी खळबळ उडाली आहे.
आवडत्या पोस्टिंगसाठी ‘बाबा’चा सहारा?
मिळालेल्या माहितीनुसार, खरातच्या संपर्कात असलेल्या या महिला अधिकाऱ्यांपैकी एक डीसीपी (DCP) तर दुसरी एसीपी (ACP) दर्जाची अधिकारी आहे. आपल्या पसंतीच्या ठिकाणी बदली किंवा पोस्टिंग मिळावी यासाठी या दोन्ही अधिकाऱ्यांनी खरातची मदत घेतली होती का, असा संशय व्यक्त केला जात आहे. या बदल्यांच्या बदल्यात खरातसोबत काही आर्थिक व्यवहार झाले आहेत का? यादृष्टीने आता तपास यंत्रणांनी मोर्चा वळवला आहे.
विज्ञानाच्या नावाखाली लैंगिक शोषणाचं जाळं
एसआयटी (SIT) समोर झालेल्या चौकशीत खरातने धक्कादायक खुलासे केले आहेत. “दुनिया झुकती है, झुकानेवाला चाहिए,” अशी दर्पोक्ती करत त्याने आपल्या गुन्ह्यांची कबुली दिल्याचे समजते. ज्याला लोक चमत्कार किंवा वशीकरण समजायचे, ती केवळ हातचलाखी असल्याचे त्याने मान्य केले. विज्ञानाचे नाव देऊन महिलांना जाळ्यात ओढणे आणि नंतर त्यांना धमकावून त्यांचे लैंगिक शोषण केल्याची कबुली खरातने दिली आहे.
कुटुंबीयांचीही होणार कसून चौकशी
अशोक खरातच्या पोलीस कोठडीचा आज शेवटचा दिवस असून, तपासाची व्याप्ती आता त्याच्या कुटुंबापर्यंत वाढली आहे. त्याचा मुलगा हर्षवर्धन आणि मुलीची आज एसआयटीकडून चौकशी केली जाणार आहे. दरम्यान, खरातची पत्नी कल्पना अजूनही फरार असून पोलीस तिचा शोध घेत आहेत. या प्रकरणातील तपासाचा प्रगती अहवाल आणि आतापर्यंत हाती लागलेले पुरावे यावर भाष्य करण्यासाठी एसआयटी प्रमुख तेजस्वी सातपुते आज संध्याकाळी पत्रकार परिषद घेणार आहेत. या परिषदेत खरातचे आर्थिक व्यवहार आणि लैंगिक शोषणाबाबत मोठे खुलासे होण्याची शक्यता आहे. सरकारवाडा पोलीस ठाण्यात दाखल असलेल्या गुन्ह्याचा तपास आता अंतिम टप्प्यात पोहोचला असून, खरातला मदत करणाऱ्यांचे चेहरे लवकरच समोर येण्याची चिन्हे आहेत.
