Shiv Sena faction : बुलढाणा जिल्ह्यात एकनाथ शिंदे यांच्या शिवसेनेत मोठा वाद उफाळून आला आहे. देऊळगाव राजा येथे झालेल्या बैठकीदरम्यान दोन गटांमध्ये जोरदार राडा झाल्याने पक्षातील अंतर्गत गटबाजी पुन्हा एकदा उघड झाली आहे.
नवनियुक्त जिल्हा संपर्कप्रमुख संजय सोनार यांच्या उपस्थितीत ही बैठक पार पडत होती. यावेळी माजी आमदार डॉ. शशिकांत खेडेकर यांच्यासह अनेक पदाधिकारी उपस्थित होते. मात्र बैठक सुरू असतानाच काही माजी पदाधिकाऱ्यांनी आपल्याला निमंत्रण नसल्याचा आरोप करत सभागृहात प्रवेश केला आणि घोषणाबाजी सुरू केली.
संजय सोनार यांच्या सत्काराला विरोध केल्यामुळे वातावरण अधिक तापले. दोन्ही गटांमध्ये सुरुवातीला शाब्दिक वाद झाला, जो पुढे थेट धक्काबुक्की आणि हाणामारीपर्यंत पोहोचला. काहींनी एकमेकांची कॉलर पकडल्याचेही समोर आले आहे.
यावेळी काही कार्यकर्त्यांनी डॉ. खेडेकर यांच्या कार्यपद्धतीवर प्रश्न उपस्थित केल्याने वाद आणखी चिघळला. संपूर्ण प्रकार संपर्कप्रमुखांच्या समोरच घडल्याने पक्षातील मतभेद उघडपणे समोर आले आहेत.
या घटनेमुळे जिल्ह्यात शिंदे गटातील अंतर्गत संघर्ष तीव्र झाल्याची चर्चा सुरू असून, आगामी राजकारणावर याचा परिणाम होण्याची शक्यता व्यक्त केली जात आहे.
