PM Modi Address to Nation: पंतप्रधान नरेंद्र मोदी आज रात्री ८:३० वाजता देशाला संबोधित करणार आहेत. या संबोधनामुळे राजकीय वर्तुळात आणि सर्वसामान्य जनतेमध्ये कमालीची उत्सुकता निर्माण झाली आहे. यापूर्वी पंतप्रधानांनी जेव्हा जेव्हा रात्रीच्या वेळी देशाला संबोधित केले आहे, तेव्हा नोटाबंदी, कलम ३७० किंवा लॉकडाऊन यांसारखे ऐतिहासिक आणि मोठे निर्णय जाहीर झाले आहेत. आजच्या संबोधनाचा नेमका विषय अद्याप अधिकृतपणे जाहीर करण्यात आलेला नाही, मात्र देशहिताच्या दृष्टीने एखादी मोठी घोषणा होण्याची शक्यता वर्तवली जात आहे.
महिला आरक्षण विधेयक फेटाळल्यानंतर मोदींचा आक्रमक पवित्रा
हे संबोधन अशा वेळी होत आहे, जेव्हा अवघ्या एक दिवसापूर्वी महिला आरक्षणाशी संबंधित महत्त्वाचे विधेयक लोकसभेत मंजूर होऊ शकले नाही. या पार्श्वभूमीवर पंतप्रधानांनी तातडीची मंत्रिमंडळ बैठक बोलावली होती. सूत्रांच्या माहितीनुसार, या बैठकीत त्यांनी आपली तीव्र नाराजी व्यक्त केली. “हे विधेयक फेटाळले जाणे हा सरकारचा पराभव नसून, देशातील महिलांना त्यांचे हक्क मिळण्यापासून रोखण्यासाठी विरोधकांनी घातलेला हा अडथळा आहे,” असे खडे बोल त्यांनी सुनावले. महिलांना निर्णय-प्रक्रियेत स्थान देण्याची वेळ आली असताना विरोधकांनी घेतलेली ही भूमिका त्यांनाच महाग पडेल, असा इशाराही त्यांनी दिला.
विरोधकांवर साधला निशाणा; सदसद्विवेकबुद्धीचे केले होते आवाहन
शुक्रवारी मतदानापूर्वी पंतप्रधानांनी सर्व खासदारांना आपल्या सदसद्विवेकबुद्धीचा आवाज ऐकून महिलांच्या बाजूने उभे राहण्याचे आवाहन केले होते. देशाच्या निम्म्या लोकसंख्येला त्यांचे न्याय्य स्थान मिळवून देणे हे आपले कर्तव्य असल्याचे त्यांनी म्हटले होते. मात्र, विधेयक नामंजूर झाल्याने आता पंतप्रधान थेट जनतेशी संवाद साधून आपली पुढील दिशा स्पष्ट करतील, अशी अपेक्षा आहे. आजच्या ८:३० च्या संबोधनाकडे केवळ भारताचेच नव्हे, तर जगाचे लक्ष लागले असून, प्रशासन यावर काय नवीन पाऊल उचलते, हे पाहणे महत्त्वाचे ठरेल.
