Ashok Kharat : नाशिकमधील भोंदू अशोक खरात याची प्रकृती अचानक बिघडल्याची माहिती समोर आली आहे. एसआयटी चौकशीदरम्यान त्याला छातीत दुखू लागल्याने तातडीने कार्डियाक ॲम्बुलन्स बोलावून प्राथमिक तपासणी करण्यात आली.
मिळालेल्या माहितीनुसार, खरात यांना डोकेदुखी, मळमळ आणि उलटीचा त्रास होत होता. छातीत वेदना जाणवत असल्याने काही काळ त्यांना ऑक्सिजन देण्यात आला. दोन दिवसांपूर्वीच त्यांच्या वकिलांनी न्यायालयात त्यांना न्यूरोसर्जनकडे तपासणीसाठी नेण्याची मागणी केली होती.
दरम्यान, या प्रकरणात विशेष तपास पथक म्हणजेच SIT कडून तपासाला वेग देण्यात आला आहे. शहरातील एका नामांकित हॉटेल व्यावसायिकाची तब्बल सहा तास चौकशी करण्यात आली. आर्थिक व्यवहार आणि जमीन खरेदी-विक्रीतील संभाव्य संबंधांबाबत सखोल चौकशी केल्याची माहिती सूत्रांनी दिली.
चौकशीनंतर संबंधित व्यावसायिकाला रात्री उशिरा सोडण्यात आले. दरम्यान, अशोक खरात यांची पोलीस कोठडी उद्या संपणार असून त्यांना पुन्हा न्यायालयात हजर केले जाणार आहे. त्याआधी विविध मुद्द्यांवर एसआयटीकडून तपास अधिक तीव्र करण्यात आला आहे.
