Pune Crime: डेक्कन येथील नदीपात्रात १९ एप्रिल रोजी सकाळी एका तरुणाचा रक्ताच्या थारोळ्यात मृतदेह आढळल्याने पुणे शहर हादरले होते. गंज पेठ येथील रहिवासी कृषल कसबे (वय ४२) यांची धारदार शस्त्राने गळा चिरून निर्घृण हत्या करण्यात आली होती. या गुन्ह्याचा छडा लावत पोलिसांनी ओंकार कांबळे (वय २७, रा. धनकवडी) या मुख्य संशयिताला ताब्यात घेतले आहे.
पैशांच्या वादातून टोकाचे पाऊल
पोलीस तपासात मिळालेल्या माहितीनुसार, हत्येचे मुख्य कारण आर्थिक व्यवहार असल्याचे स्पष्ट झाले आहे. आरोपी ओंकार कांबळे याने मृत कृषल कसबे यांच्याकडून ७० हजार रुपये घेतले होते. या पैशांच्या परतफेडीवरून दोघांमध्ये गेल्या काही दिवसांपासून खटके उडत होते. घटनेच्या दिवशीही याच कारणावरून त्यांच्यात बाचाबाची झाली आणि रागाच्या भरात ओंकारने शस्त्राने कृषल यांचा गळा चिरून त्यांना संपवले.
पुराव्यांची विल्हेवाट लावण्याचा अयशस्वी प्रयत्न
आरोपींनी पोलिसांच्या नजरेतून वाचण्यासाठी अतिशय चलाखीने प्रयत्न केले होते. गुन्हा केल्यानंतर ओळख पटू नये म्हणून आरोपींनी स्वतःचे रक्ताळलेले कपडे बदलले होते.
गुन्हे शाखेला हडपसर परिसरात आरोपीची दुचाकी सापडली, ज्यावर रक्ताचे डाग होते. दुचाकीच्या डिकीमध्ये पोलिसांना तीन मोबाईल संचही आढळून आले आहेत.
डेक्कन पोलिसांची मोठी कारवाई
मृतदेह आढळून आल्यानंतर डेक्कन पोलीस आणि गुन्हे शाखेने समांतर तपास सुरू केला होता. तांत्रिक विश्लेषण आणि खबऱ्यांच्या मदतीने पोलिसांनी आरोपींच्या मुसक्या आवळल्या. ही कारवाई डेक्कन पोलीस ठाण्याचे वरिष्ठ पोलीस निरीक्षक आणि त्यांच्या पथकाने केली असून, आरोपींना आता न्यायालयासमोर हजर करण्यात येणार आहे.
