IMD Weather Update: एप्रिलमधील विक्रमी उष्णतेनंतर मे महिना दिलासादायक ठरेल की उन्हाचा चटका आणखी वाढेल, यावर भारतीय हवामान विभागाने (IMD) प्रकाश टाकला आहे. यंदा मे महिन्यात देशातील अनेक भागांत सरासरीपेक्षा अधिक पावसाची शक्यता असून मान्सूनच्या प्रवासाबाबतही महत्त्वाची माहिती समोर आली आहे.
तापमानात चढ-उतार
हवामान खात्याच्या अंदाजानुसार, मे महिन्यात देशातील बहुतांश भागांत दिवसाचे तापमान सामान्य किंवा त्यापेक्षा कमी राहण्याची शक्यता आहे. मात्र, रात्रीच्या किमान तापमानात वाढ होणार असल्याने रात्रीची झोप उकाड्यामुळे विस्कळीत होऊ शकते. विशेषतः दक्षिण आणि वायव्य भारतातील राज्यांमध्ये दिवसाचा पाराही सरासरीपेक्षा जास्त राहण्याची भीती आहे.
पावसाची जोरदार हजेरी
मे महिन्यात संपूर्ण देशात सरासरीच्या 110% पेक्षा जास्त पाऊस पडण्याची शक्यता आहे. देशात मे महिन्याची पावसाची सरासरी साधारणपणे 61.4 मिमी असते, जी यंदा ओलांडली जाण्याची चिन्हे आहेत. एकूणच या पावसामुळे तापमानात घट होऊन नागरिकांना वाढत्या उष्णतेपासून तात्पुरता दिलासा मिळू शकेल. तथापि, ईशान्य आणि पूर्व भारतात पावसाचे प्रमाण कमी राहण्याचा अंदाज असल्याने तेथे कोरडे हवामान असेल.
मान्सूनचे आगमन: महत्त्वाची तारीख
मान्सूनच्या प्रतिक्षेत असलेल्यांसाठी आनंदाची बातमी म्हणजे मान्सून 14 ते 16 मे दरम्यान अंदमान आणि निकोबार बेटांवर दाखल होण्याची दाट शक्यता आहे. साधारण 20 मे पर्यंत मान्सूनच्या प्रवासाला अधिक वेग येण्याचे संकेत आहेत. पॅसिफिक महासागरात ‘एल निनो’ची स्थिती विकसित होत असल्याने पावसाच्या वितरणावर त्याचा काही प्रमाणात परिणाम होऊ शकतो.
उष्णतेची लाट आणि विजेचा प्रश्न
पावसाची शक्यता असली तरी महाराष्ट्र, गुजरात आणि पूर्व किनारपट्टीवरील राज्यांत मे महिन्यात उष्णतेच्या लाटेचे (Heat Wave) दिवस वाढण्याची शक्यता आहे. एप्रिलमधील उष्णतेमुळे देशात विजेच्या मागणीत 4% वाढ झाली असून, मे मध्येही हे प्रमाण उच्चांकी राहण्याची शक्यता वर्तवण्यात आली आहे.
