Daund Crime: बाप-लेकीच्या पवित्र नात्याला काळीमा फासणारी एक अत्यंत संतापजनक घटना दौंड तालुक्यातील देऊळगावराजे परिसरात घडली आहे. केवळ गुणपत्रिकेतील खाडाखोड केल्याच्या किरकोळ कारणावरून, एका नराधम बापाने आपल्या ९ वर्षांच्या चिमुकलीचा अमानुष छळ करून तिचा जीव घेतला. दारूच्या नशेत केलेल्या या कृत्यामुळे संपूर्ण पुणे जिल्हा सुन्न झाला आहे.
संताप अन् क्रूरतेचा कळस
मिळालेल्या माहितीनुसार, आरोपी शांताराम चव्हाण (वय ३३) याच्या दोन्ही मुलांचे शाळेचे निकाल नुकतेच लागले होते. मुलगा संस्कार याचा वर्गात पहिला क्रमांक आला होता. मात्र, मुलगी अनामिका (वय ९) हिने भावाच्या गुणपत्रिकेत खाडाखोड केली. याचा राग मनात धरून आणि दारूच्या नशेत धुंद असलेल्या शांतारामने अनामिकाला आधी लाकडाच्या फटक्यांनी बेदम मारहाण केली. त्यानंतर, क्रूरतेची सीमा ओलांडत त्याने लाकूड कापण्याच्या ‘कटर मशिन’ने तिच्या गळ्यावर आणि हातावर वार केले.
पुरावा नष्ट करण्यासाठी घर पेटवले
मुलीचा जागीच मृत्यू झाल्यानंतर, आरोपीने तिचे शरीर एका साडीत गुंडाळले आणि पुरावा नष्ट करण्याच्या उद्देशाने घरातच मृतदेह पेटवून दिला. या आगीत घरही जळाले. घटनेची माहिती मिळताच पोलिसांनी धाव घेतली असता, जळालेल्या घराच्या राखेमध्ये चिमुकलीचा अर्धवट जळालेला मृतदेह आणि रक्ताने माखलेले मशिन सापडले.
पोलिसी कारवाई
दौंड पोलिसांनी याप्रकरणी तातडीने कारवाई करत आरोपी शांताराम चव्हाण याला बेड्या ठोकल्या आहेत. त्याच्यावर भारतीय न्याय संहितेच्या कलम १०३ (१) आणि २३८ अन्वये गुन्हा दाखल करण्यात आला आहे. पोलीस उपनिरीक्षक सुनील उगले या प्रकरणाचा अधिक तपास करत आहेत.
