Pune News : पुणे जिल्ह्यातील दौंड तालुक्यातून धक्कादायक घटना समोर आली आहे. सासरकडून होत असलेल्या मानसिक आणि शारीरिक छळाला कंटाळून एका विवाहितेने गळफास घेऊन आत्महत्या केली. या प्रकरणी पतीसह पाच जणांविरोधात दौंड पोलीस ठाण्यात गुन्हा दाखल करण्यात आला आहे.
मृत महिलेचं नाव गोकुळा पांडुरंग मेरगळ (वय 41) असं आहे. त्यांचा विवाह जुलै 2023 मध्ये झाला होता. लग्नानंतर काही महिन्यांतच पतीकडून आणि सासरच्या मंडळींकडून छळ सुरू झाल्याचा आरोप आहे.
फिर्यादीनुसार, पती किरकोळ कारणांवरून मारहाण करत असे. “तू रोगीट आणि मनोरुग्ण आहेस, तुझा खर्च मला झेपत नाही, माहेरून पैसे आण,” असे टोमणे मारून तिला त्रास दिला जात होता. तसेच गर्भधारणा होऊ नये म्हणून जबरदस्तीने गर्भनिरोधक गोळ्या दिल्याचाही आरोप करण्यात आला आहे.
या सततच्या छळाला कंटाळून गोकुळा यांनी शनिवारी पहाटे राहत्या घरी आत्महत्या केली. त्यांच्या भावाच्या तक्रारीवरून पोलिसांनी पतीसह पाच जणांविरोधात गुन्हा दाखल केला असून पुढील तपास सुरू आहे.
