Shirdi Defense Hub: भक्ती आणि अध्यात्माची नगरी म्हणून जगभर कीर्ती असलेल्या शिर्डीची ओळख आता बदलणार आहे. ‘मेक इन इंडिया’ आणि ‘आत्मनिर्भर भारत’ या संकल्पनेला मूर्त रूप देत, शिर्डीत देशातील सर्वात मोठा खासगी संरक्षण साहित्य निर्मिती प्रकल्प दिमाखात उभा राहिला आहे. यामुळे आता साईनगरीच्या पवित्र मातीत भारतीय लष्कराची ताकद वाढवणारे रॉकेट लाँचर आणि बॉम्ब तयार होणार आहेत.
वर्षाला ५ लाख बॉम्ब निर्मिती
‘निबे ग्रुप’च्या पुढाकाराने अवघ्या 1 वर्षाच्या विक्रमी कालावधीत 200 एकर परिसरात हा महाप्रकल्प साकारला आहे. या कारखान्याची क्षमता वर्षाकाठी तब्बल 5 लाख बॉम्ब शेल्स उत्पादित करण्याची आहे. केवळ भारताचीच नव्हे, तर जगाची गरज भागवण्यासाठी येथून निर्यात केली जाणार असून, अनेक परदेशी राष्ट्रांनी या शस्त्रास्त्रांसाठी आधीच बुकिंग केले आहे.
संरक्षणमंत्र्यांच्या उपस्थितीत ऐतिहासिक सोहळा
येत्या 23 मे रोजी या प्रकल्पाचे भव्य लोकार्पण देशाचे संरक्षणमंत्री राजनाथ सिंह यांच्या हस्ते पार पडणार आहे. या ऐतिहासिक प्रसंगी ‘चीफ ऑफ डिफेन्स स्टाफ’ (CDS) जनरल अनिल चौहान, मुख्यमंत्री देवेंद्र फडणवीस आणि पालकमंत्री राधाकृष्ण विखे पाटील यांची विशेष उपस्थिती असणार आहे.
