Mumbai-Pune Expressway Accident: मुंबई-पुणे एक्सप्रेसवेवर अपघातांची मालिका थांबण्याचे नाव घेत नाहीये. महाराष्ट्र नवनिर्माण सेनेचे ज्येष्ठ नेते आणि राज ठाकरे यांचे अत्यंत निकटवर्तीय मानले जाणारे दिलीप धोत्रे यांच्या गाडीला भीषण अपघात झाला आहे. या अपघातात धोत्रे गंभीर जखमी झाले असून त्यांच्यावर पुण्यातील एका खासगी रुग्णालयात अतिदक्षता विभागात उपचार सुरू आहेत.
गाडीचा चक्काचूर; भीषण धडक
मिळालेल्या माहितीनुसार, दिलीप धोत्रे हे आपल्या खाजगी वाहनाने मुंबईहून पुण्याच्या दिशेने जात होते. प्रवास सुरू असतानाच त्यांच्या वाहनाला एका भरधाव वाहनाने जोरदार धडक दिली. ही धडक इतकी भीषण होती की धोत्रे यांच्या कारचा पुढच्या भागाचा अक्षरशः चक्काचूर झाला आहे. या अपघातात त्यांच्या छातीला आणि पायाला गंभीर इजा झाली असून मोठ्या प्रमाणावर रक्तस्त्राव झाल्याचे समजते.
अपघाताचे कारण अद्याप अस्पष्ट
हा अपघात तांत्रिक बिघाडामुळे झाला की चालकाचे नियंत्रण सुटल्याने, याचा तपास पोलीस करत आहेत. प्राथमिक अंदाजानुसार, वेगावर नियंत्रण न राहिल्याने हा अपघात घडला असावा, अशी शक्यता वर्तवण्यात येत आहे. अपघाताची माहिती मिळताच महामार्ग पोलिसांनी घटनास्थळी धाव घेत मदतकार्य राबवले आणि धोत्रे यांना तातडीने पुण्यातील रुग्णालयात हलवले.
कार्यकर्त्यांची पुण्याकडे धाव
धोत्रे यांच्या अपघाताची बातमी वाऱ्यासारखी पसरताच पंढरपूर, सोलापूर आणि पुणे जिल्ह्यातील मनसे कार्यकर्त्यांमध्ये मोठी खळबळ उडाली आहे. अनेक वरिष्ठ पदाधिकारी आणि कार्यकर्त्यांनी पुण्यातील रुग्णालयाकडे धाव घेतली आहे. सध्या त्यांची प्रकृती चिंताजनक असून डॉक्टर शर्थीचे प्रयत्न करत आहेत.
