Silver Bricks Van Overturn: मुंबई-अहमदाबाद राष्ट्रीय महामार्गावर आज एका भीषण अपघाताने खळबळ उडवून दिली. तब्बल ६०० किलो चांदीच्या विटांची वाहतूक करणारी एक व्हॅन चारोटी उड्डाणपुलावर नियंत्रण सुटल्याने उलटली. या व्हॅनमध्ये असलेल्या चांदीची आंतरराष्ट्रीय बाजारातील किंमत सुमारे १७ कोटी ६६ लाख रुपये इतकी असून, अपघाताची माहिती मिळताच पोलिसांनी घटनास्थळाचा ताबा घेतला आहे.
नेमकी घटना काय?
मुंबईतील नामांकित ‘नाकोडा बुलियन’ कंपनीकडून चांदीच्या विटांचा मोठा साठा गुजरातच्या दिशेने पाठवण्यात येत होता. वापी (जीआयडीसी) येथील ‘मोदी सन्स लिमिटेड’कडे ही चांदी पोहोचवली जाणार होती. मात्र, चारोटी उड्डाणपुलावर पोहोचताच चालकाचे वाहनावरील नियंत्रण सुटले आणि ही मौल्यवान साठा वाहून नेणारी व्हॅन पलटी झाली. सुदैवाने, या अपघातात चालक किरकोळ जखमी झाला असून त्याला तातडीने रुग्णालयात दाखल करण्यात आले आहे.
पोलिसांचा मोठा फौजफाटा तैनात
अपघातग्रस्त व्हॅनमध्ये इतक्या मोठ्या प्रमाणावर चांदी असल्याचे समजताच पोलीस प्रशासनाची धावपळ उडाली. कासा पोलिसांनी तातडीने घटनास्थळी धाव घेत चांदीच्या सुरक्षेसाठी कडेकोट बंदोबस्त तैनात केला.
वाहतुकीवर परिणाम
ऐन महामार्गावर आणि तेही उड्डाणपुलावर हा अपघात झाल्याने मुंबई-अहमदाबाद मार्गावरील वाहतूक काही काळासाठी विस्कळीत झाली होती. वाहनांच्या लांबच लांब रांगा लागल्याने प्रवाशांचे हाल झाले, मात्र पोलिसांनी क्रेनच्या साहाय्याने वाहन बाजूला करून रस्ता मोकळा केला आहे. सध्या ही चांदी सुरक्षित असून कासा पोलीस या प्रकरणाचा अधिक तपास करत आहेत. सोन्या-चांदीचे दर गगनाला भिडलेले असताना झालेल्या या ‘मौल्यवान’ अपघाताची चर्चा संपूर्ण जिल्ह्यात रंगली आहे.
