मुंबई : राज्याच्या राजकारणात पुन्हा एकदा चर्चांना उधाण आले आहे. राष्ट्रवादी काँग्रेसमध्ये अंतर्गत मतभेदांच्या चर्चा सुरू असतानाच पक्षाचे प्रदेशाध्यक्ष सुनील तटकरे यांनी मुख्यमंत्री देवेंद्र फडणवीस यांची भेट घेतली. त्यामुळे राजकीय वर्तुळात विविध तर्क-वितर्कांना सुरुवात झाली आहे.
‘वर्षा’ निवासस्थानी झाली भेट
माहितीनुसार, मुख्यमंत्री देवेंद्र फडणवीस यांच्या ‘वर्षा’ या शासकीय निवासस्थानी सुनील तटकरे यांनी भेट घेतली. या भेटीत नेमकी कोणत्या विषयावर चर्चा झाली, याबाबत अद्याप अधिकृत माहिती समोर आलेली नाही. मात्र काही दिवसांपूर्वी पार्थ पवार यांनीही फडणवीसांची भेट घेतल्याने या नव्या भेटीला अधिक राजकीय महत्त्व प्राप्त झाले आहे.
राष्ट्रवादीत अंतर्गत नाराजीच्या चर्चा
राष्ट्रवादी काँग्रेसच्या राष्ट्रीय कार्यकारिणीच्या यादीवरून पक्षात नाराजी असल्याची चर्चा सुरू आहे. निवडणूक आयोगाला सादर करण्यात आलेल्या पत्रात काही वरिष्ठ नेत्यांच्या नावांसमोर पदांचा उल्लेख नसल्याचे समोर आले होते. यामध्ये सुनील तटकरे यांच्या नावापुढे प्रदेशाध्यक्ष पदाचा, तर प्रफुल्ल पटेल यांच्या नावापुढे कार्याध्यक्ष पदाचा उल्लेख नसल्याने चर्चांना उधाण आले होते.
सुनेत्रा पवार आणि वरिष्ठ नेत्यांमध्ये मतभेद?
सूत्रांच्या माहितीनुसार, पक्षाच्या राष्ट्रीय अध्यक्षा सुनेत्रा पवार आणि काही वरिष्ठ नेत्यांमध्ये मतभेद असल्याची चर्चा राजकीय वर्तुळात रंगली आहे. त्यामुळे पक्षातील अंतर्गत समीकरणांवर प्रश्नचिन्ह उपस्थित होत आहेत.
राष्ट्रवादीकडून नाराजी फेटाळली
दरम्यान, राष्ट्रवादी काँग्रेसचे प्रवक्ते सुरज चव्हाण यांनी पक्षात कोणतीही नाराजी नसल्याचा दावा केला आहे. “सुनेत्रा पवार, प्रफुल्ल पटेल आणि सुनील तटकरे हे पक्षाचे महत्त्वाचे नेते आहेत. पक्षात सर्व काही आलबेल आहे,” असे त्यांनी स्पष्ट केले.
राजकीय चर्चांना उधाण
तटकरे-फडणवीस भेटीनंतर राज्याच्या राजकारणात नव्या चर्चांना उधाण आले असून, राष्ट्रवादीतील पुढील घडामोडींवर सर्वांचे लक्ष लागले आहे.
