Ashok Kharat Case: स्वतःला देवाचा अवतार सांगून भक्तांना कोट्यवधी रुपयांचा गंडा घालणाऱ्या भोंदू बाबा अशोक खरात याच्या अडचणीत कमालीची वाढ झाली आहे. मनी लॉन्डरिंग (पैशांची बेकायदेशीर अफरातफर) प्रकरणात अंमलबजावणी संचालनालयाने (ED) अटक केल्यानंतर आज खरातला न्यायालयात हजर करण्यात आले. या वेळी ईडीने बाबाच्या आर्थिक साम्राज्याचे अनेक धक्कादायक पुरावे कोर्टासमोर सादर केले, तर दुसरीकडे खरातने “मला फसवण्यात आले,” असा कांगावा करत सर्व आरोपांपासून हात झटकण्याचा प्रयत्न केला. दोन्ही बाजूंचा युक्तिवाद ऐकल्यानंतर न्यायालयाने अशोक खरातला 26 मेपर्यंत ईडी कोठडी सुनावली आहे.
‘त्या’ ६० खात्यांशी माझा संबंध नाही; खरातचा अजब दावा
न्यायालयात जेव्हा ईडीने बँक खात्यांचे पुरावे सादर केले, तेव्हा अशोक खरातने स्वतःचा बचाव करताना सांगितले की, “त्या 60 खात्यांवर मला नॉमिनी का आणि कसे ठेवले गेले, याची मला काहीच कल्पना नाही. माझा मोबाईल नंबर त्या खात्यांना का जोडला गेला, हेही मला माहीत नाही. मला बँकेकडून फक्त 9 टक्के दराने चांगले व्याज मिळेल असे सांगण्यात आले होते, म्हणूनच मी तिथे गेलो होतो.”
ईडीने कोर्टात उघड केला भोंदू बाबाचा ‘मास्टरप्लॅन’:
धार्मिक भीती दाखवून ५.६२ कोटींची वसुली: खरातने आपण देवाचा अवतार असल्याचा खोटा आव आणला. लोकांच्या मनात भीती निर्माण करून पूजा-अर्चा आणि धार्मिक विधींच्या नावाखाली तब्बल 5 कोटी 62 लाख रुपये उकळले. एकाच व्यक्तीकडून 3 कोटी 80 लाख, तर इतरांकडून 50 ते 80 लाख रुपये उकळल्याचे समोर आले आहे. यातील काही पैसे अमेरिकेत उपचारासाठी वापरल्याचाही संशय आहे.
६० खाती, पण नंबर एकच:
समता पतसंस्थेमध्ये 60 वेगवेगळ्या व्यक्तींच्या नावाने खाती उघडण्यात आली होती. विशेष म्हणजे, ही सर्व खाती वेगवेगळ्या लोकांची असली, तरी त्या सर्वांना जोडलेला मोबाईल नंबर आणि त्या खात्यांचा ‘नॉमिनी’ एकटा अशोक खरातच होता. या संशयास्पद खात्यांमधून तब्बल 23 कोटी 80 लाख रुपये रोख (Cash) स्वरूपात काढण्यात आले आहेत. एवढी मोठी रोकड कुठे गायब करण्यात आली, याचा तपास ईडी करत आहे.
३४ बेनामी एफडी (FD) खाती:
पतसंस्थेमध्ये कोणत्याही केवायसी (KYC) किंवा वैध कागदपत्रांशिवाय 34 बेनामी मुदत ठेव (FD) खाती सुरू करण्यात आली होती. खरात स्वतः बँकेत जाऊन 4 ते 6 लाख रुपये रोख जमा करायचा. अशा प्रकारे 1 कोटी 34 लाख रुपयांच्या एफडी करण्यात आल्या आणि त्या मॅच्युअर झाल्यावर साधारण 3 कोटी रुपये रोख काढण्यात आले.
