Tukaram Mundhe : शिर्डीत साईबाबांच्या दर्शनासाठी येणाऱ्या लाखो भाविकांच्या श्रद्धेचा गैरफायदा घेत त्यांच्या आरोग्याशी अक्षम्य खेळ सुरू असल्याचा धक्कादायक प्रकार उघडकीस आला आहे. मंदिर परिसरातील खाजगी दुकानांमध्ये विकल्या जाणाऱ्या पेढ्यांना चक्क बुरशी लागल्याच्या तक्रारी भाविकांनी केल्या आहेत. धक्कादायक बाब म्हणजे, या प्रसादाच्या पाकिटांवर तो कधी तयार केला, त्याची अंतिम मुदत (एक्सपायरी डेट) काय आहे, किंवा हा पेढा कोणी उत्पादित केला, याबद्दलची कोणतीही कायदेशीर माहिती छापलेली नाही. अनेक वर्षांपासून अत्यंत निकृष्ट आणि दगडासारख्या कडक प्रसादाची विक्री उघडपणे सुरू होती. या गंभीर प्रकाराकडे स्थानिक नगरपालिका आणि अन्न व औषध प्रशासनाचे (FDA) दीर्घकाळापासून दुर्लक्ष झाल्याने भाविकांमधून तीव्र संताप व्यक्त केला जात होता.
एफडीए पथकाची शिर्डीत धडक छापेमारी
अन्न व औषध प्रशासनाच्या आयुक्तपदाची धुरा हाती घेताच डॅशिंग सनदी अधिकारी तुकाराम मुंढे यांनी राज्यभरातील भेसळखोरांविरोधात मोठी मोहीम उघडली आहे. शिर्डीतील या गैरप्रकाराचे वृत्त समोर येताच मुंढे यांच्या आदेशानुसार एफडीएचे विशेष पथक तातडीने शिर्डीत दाखल झाले. पथकाने पाऊल ठेवताच मंदिर परिसरातील पेढ्यांच्या दुकानांवर एकाच वेळी छापे टाकण्यास सुरुवात केली. अचानक झालेल्या या धडक कारवाईमुळे शिर्डीतील भेसळयुक्त आणि निकृष्ट अन्नपदार्थ विकणाऱ्या व्यापाऱ्यांचे धाबे दणाणले आहेत.
पेढ्यांचे नमुने जप्त; दोषी उत्पादकांवर होणार फौजदारी कारवाई
प्रशासनाच्या पथकाने कारवाईदरम्यान संशयास्पद पेढ्यांचे साठे जप्त करून त्याचे नमुने प्रयोगशाळेत (लॅब) तपासणीसाठी पाठवले आहेत. यासोबतच, हे पेढे पुरवणाऱ्या मुख्य कारखानदारांचा आणि उत्पादकांचा शोध घेण्यासाठी विक्रेत्यांकडे कसून चौकशी सुरू करण्यात आली आहे. लॅब अहवालात प्रसादाचा दर्जा निकृष्ट किंवा आरोग्यासाठी घातक आढळल्यास, संबंधित उत्पादक आणि विक्रेत्यांवर कायद्यानुसार कठोर फौजदारी कारवाई केली जाईल, असा कडक इशारा प्रशासनाने दिला आहे.
