मुंबई: शुक्रवारी मुंबई उच्च न्यायालयाला बॉम्बने उडवून देण्याची धमकी देणारा ईमेल प्राप्त झाला. बॉम्बची धमकी मिळाल्याची माहिती मिळाल्यानंतर परिसरात तात्काळ सुरक्षा वाढवण्यात आली. तसेच न्यायालयाच्या इमारतीतील सर्व कर्मचाऱ्यांना आणि उपस्थित लोकांना सुरक्षिततेसाठी बाहेर काढण्यात आले. न्यायालयातील सर्व न्यायालयीन कामकाज आणि प्रशासकीय कामकाज तात्पुरते स्थगित करण्यात आले आहे. घटनास्थळी बॉम्ब शोधक आणि निकामी करणारे पथक तसेच श्वान पथके दाखल झाली असून त्यांनी इमारतीच्या प्रत्येक कोपऱ्याचा सविस्तर तपास सुरू केला आहे.
धमकीचा ईमेल कसा आणि कोणाकडून पाठवला गेला याचा शोध घेण्यासाठी सायबर तपास सुरू आहे. पोलिसांनी न्यायालयाच्या परिसराभोवती सुरक्षा बळकटी केली असून, प्रवेशास बंदी घालण्यात आली आहे. पोलिस अधिकाऱ्यांच्या मते, धमकी मिळाल्यानंतर त्वरित सुरक्षा उपाययोजना राबवण्यात आल्या. सध्या या प्रकरणाचा तपास सुरू असून ईमेलमधील माहितीच्या आधारे संभाव्य धोक्याचा आढावा घेतला जात आहे.
मुंबई उच्च न्यायालयातील कर्मचारी आणि न्यायालयीन कामकाजाशी संबंधित व्यक्तींना सुरक्षा आणि सतर्क राहण्याचा सल्ला देण्यात आला आहे. नागरिकांनी न्यायालय परिसराजवळ गर्दी करू नये, असे आवाहन पोलिसांनी केले आहे. तथापी, आज दिल्ली उच्च न्यायालयालाही बॉम्बने उडवण्याची धमकी देण्यात आली. धमकीच्या ईमेलमध्ये न्यायाधीशांच्या खोलीत तीन बॉम्ब ठेवण्यात आल्याचे म्हटले आहे. यासोबतच दुपारी 2 वाजेपर्यंत न्यायालय परिसर रिकामा करण्याचे सांगण्यात आले आहे.
