Free LPG Connection: केंद्र सरकारने महिला सक्षमीकरणाच्या दिशेने आणखी एक महत्त्वपूर्ण पाऊल उचलत 25 लाख महिलांना मोफत एलपीजी कनेक्शन देण्याचा निर्णय घेतला आहे. हे कनेक्शन 2025-26 आर्थिक वर्षात प्रधानमंत्री उज्ज्वला योजनेअंतर्गत (PMUY) वितरीत केले जातील. यामुळे देशभरातील उज्ज्वला कुटुंबातील सदस्यांची एकूण संख्या 10.60 कोटींवर पोहोचेल. पंतप्रधान नरेंद्र मोदी यांनी नवरात्रीच्या शुभ मुहूर्तावर ही घोषणा करताना म्हटले की, मी उज्ज्वला कुटुंबाशी संबंधित सर्व माता आणि भगिनींना मनापासून शुभेच्छा देतो. हे पाऊल महिला सक्षमीकरणाच्या दिशेने आमच्या संकल्पाला बळकटी देईल. मोदींच्या या पोस्टमध्ये त्यांनी महिलांचा आदर आणि त्यांच्या सक्षमीकरणाच्या उद्देशाचा उल्लेख केला आहे.
केंद्रीय पेट्रोलियम आणि नैसर्गिक वायू मंत्री हरदीप सिंग पुरी यांनी या निर्णयाचे अर्थशास्त्रीय आणि सामाजिक महत्त्व स्पष्ट केले. त्यांनी सांगितले, नवरात्रीच्या शुभ मुहूर्तावर 25 लाख नवीन डिपॉझिट-फ्री एलपीजी कनेक्शन देण्याचा निर्णय हा पंतप्रधानांच्या महिला सक्षमीकरणाच्या वचनबद्धतेचा आणखी एक पुरावा आहे. यामुळे माता आणि बहिणींचा आदर आणि सक्षमीकरण अधिक दृढ होईल.
सरकार प्रत्येक कनेक्शनवर 2,050 खर्च करेल. यात मोफत एलपीजी सिलेंडर, गॅस स्टोव्ह, रेग्युलेटर आणि इतर आवश्यक उपकरणांचा समावेश असेल. पुरी यांनी सांगितलं की, उज्ज्वला योजना ही केवळ योजना नाही, तर ती देशभरातील एका मोठ्या क्रांतीची मशाल बनली आहे, जी देशाच्या अगदी दुर्गम भागांपर्यंत पोहोचली आहे. मोदी सरकारच्या 300 अनुदानामुळे 10.33 कोटींपेक्षा जास्त उज्ज्वला कुटुंबांचे सिलिंडर फक्त 553 रुपयांमध्ये रिफिल केले जातात. ही किंमत जागतिक एलपीजी बाजारपेक्षा खूपच कमी आहे.
उज्ज्वला योजनेअंतर्गत मोफत कनेक्शन देण्याचा हा निर्णय महिलांसाठी सक्षमीकरणाची आणि स्वयंपाकासाठी आर्थिक बचतीची एक सुवर्णसंधी ठरेल. सरकारच्या या उपक्रमामुळे घरगुती ऊर्जेची उपलब्धता वाढेल, महिलांच्या दैनंदिन जीवनात सुधारणा होईल आणि ग्रामीण तसेच आर्थिकदृष्ट्या दुर्बल वर्गाला मोठा लाभ मिळेल.
