सांगली: पुढील वर्षी होणाऱ्या पुणे पदवीधर मतदार संघाची उमेदवारी नजरेसमोर ठेवून आमदार अरुण लाड यांचे चिरंजीव शरद लाड हे मंगळवारी भाजपमध्ये प्रवेश करणार आहेत. शरद लाड हे राष्ट्रवादी काँग्रेस (शरद पवार) पक्षाचे युवा प्रदेश उपाध्यक्ष आणि क्रांती सहकारी साखर कारखान्याचे अध्यक्ष आहेत. लाड यांच्या प्रवेशाने पवार गटाला मोठा धक्का बसणार आहे.
पुणे पदवीधर मतदारसंघातून गेल्या खेपेस अरुण लाड निवडून आले होते. आता भविष्यातील राजकीय महत्वकांक्षा म्हणूनच त्यांच्या पुत्राचा भाजपमध्ये प्रवेश होत असल्याचे मानले जात आहे. यामुळे जिल्ह्यातील राष्ट्रवादी काँग्रेस (शरद पवार) पक्षाला धक्का तर बसलाच आहे. याचबरोबर पलूस-कडेगाव विधानसभा मतदार संघातील विद्यमान आमदार डॉ. विश्वजित कदम यांच्या मतपेढीवरही परिणाम होण्याची शक्यता आहे. राष्ट्रवादी काँग्रेस (शरद पवार) पक्षात राहून राजकीय भवितव्य उज्वल होईलच, याची खात्री नसल्याने लाड भाजप प्रवेशासाठी राजी झाले आहेत, असे बोलले जात आहे.
विधानसभा निवडणुकीत फारसे भवितव्य नसल्याने आमदार अरूण लाड यांनी पदवीधर मतदार संघासाठी दहा वर्षापूर्वी बांधणी केली होती. त्यावेळी सत्तेत असलेल्या राष्ट्रवादीने त्यांच्याऐवजी सारंग पाटील यांना उमेदवारी दिली. लाड यांच्या बंडखोरीमुळे आघाडीचा उमेदवार पराभूत झाला. या पराभवाने खचून न जाता आमदार लाड यांनी मागील निवडणूक भाजपचे संग्राम देशमुख यांच्याविरूध्द लढवली. त्यावेळी मतदार नोंदणीपासून निवडणुकीची यंत्रणा शरद लाड यांनीच हाताळली.
सोलापूर जिल्ह्यातून शरद लाड यांचे सासरे बबन शिंदे, संजय शिंदे यांची मदतही मोलाची ठरली. पूर्वनियोजन व्यवस्थित केल्याने ४८ हजार ८२४ मतांनी अरुण लाड आमदार झाले. आता मात्र परिस्थिती बदलली आहे. पुणे पदवीधर मतदार संघ पुण्यासह सांगली, सोलापूर, कोल्हापूर, सातारा वा चार जिल्ह्यातील ५४ विधानसभा मतदार संघ आहेत. यापैकी सुमारे ४० विधानसभा मतदार संघात महायुतीचे आमदार आहेत. निवडणुकीत चार ते साडेचार लाख मतदार नोंदणी अपेक्षित असून हा सर्व मतदार सुशिक्षित असल्याने प्रचाराची पध्दतही वेगळीच राहते. भाजपचा हा पारंपारिक मतदार संघ आहे.
