जयपूर: राजस्थानची राजधानी जयपूर येथील सवाई मान सिंग (SMS) रुग्णालयातील ट्रॉमा सेंटरच्या अतिदक्षता विभागात (ICU) भीषण आग लागल्याने किमान सात रुग्णांचा दुर्दैवी मृत्यू झाला आहे. ही घटना पहाटे 1:30 वाजता ट्रॉमा सेंटरच्या न्यूरो आयसीयू वॉर्डच्या दुसऱ्या मजल्यावर असलेल्या स्टोअर रूममध्ये घडली. प्राथमिक माहितीनुसार, आग शॉर्ट सर्किटमुळे लागली, ज्यामुळे स्टोअर रूममध्ये साठवलेले साहित्य, कागदी फायली आणि वैद्यकीय उपकरणे जळून खाक झाली.
हेही वाचा – Mumbai Fire: गोरेगाव पश्चिम येथील सिटी सेंटर मॉलजवळील शालीमार मिरॅकल इमारतीला भीषण आग, पहा व्हिडिओ
या दुर्घटनेबद्दल माहिती देताना ट्रॉमा सेंटरचे प्रभारी अनुराग धाकड यांनी सांगितले की, ट्रॉमा आयसीयूमध्ये शॉर्ट सर्किट झाले आणि आग वेगाने पसरली. त्यानंतर विषारी वायू बाहेर पडले. यामुळे बहुतेक गंभीर रुग्ण बेशुद्ध पडले. सहा रुग्णांची प्रकृती अत्यंत गंभीर होती, त्यांना वाचवण्याचे खूप प्रयत्न झाले, पण त्यात यश आले नाही. मृतांमध्ये दोन महिला आणि चार पुरुषांचा समावेश आहे. नर्सिंग अधिकारी आणि वॉर्ड बॉईजच्या पथकाने तातडीने 24 रुग्णांना आयसीयूमधून ट्रॉलीवर दुसऱ्या ठिकाणी हलवले. वाचवलेल्या रुग्णांपैकी अजूनही पाच रुग्णांची प्रकृती गंभीर आहे.
मुख्यमंत्री भजनलाल शर्मांकडून रुग्णालयाला भेट
दरम्यान, घटनेची माहिती मिळताच मुख्यमंत्री भजनलाल शर्मा यांनी तातडीने एसएमएस रुग्णालयाला भेट दिली. त्यांनी रुग्ण आणि डॉक्टरांशी संवाद साधून परिस्थितीचा आढावा घेतला. मुख्यमंत्र्यांनी या दुर्घटनेवर बैठक घेऊन उच्चस्तरीय चौकशी समिती नेमण्याचे आदेश दिले आहेत. जयपूरचे पोलीस आयुक्त बिजू जॉर्ज जोसेफ यांनी सांगितले की, आगीचे नेमके कारण शोधण्यासाठी फॉरेन्सिक सायन्स लॅबोरेटरी (FSL) टीम चौकशी करत आहे. प्राथमिक दृष्ट्या शॉर्ट सर्किट हे कारण दिसत असले तरी, एफएसएलच्या तपासानंतर अंतिम निष्कर्ष काढला जाईल. मृतांचे मृतदेह शवविच्छेदनासाठी शवागारात हलवण्यात आले आहेत. या दुर्घटनेमुळे रुग्णालयाच्या सुरक्षेचा प्रश्न पुन्हा एकदा ऐरणीवर आला आहे.
