Reopening of Bhide Bridge: मेट्रो आणि इतर पायाभूत सुविधांच्या कामांमुळे काही आठवड्यांपासून बंद असलेला भिडे पूल अखेर तात्पुरता पुन्हा सुरू करण्यात येणार आहे. दिवाळीच्या पार्श्वभूमीवर शहराच्या मध्यवर्ती भागात अपेक्षित असलेल्या वाढत्या गर्दीचा विचार करून पुणे वाहतूक विभागाने हा निर्णय घेतला आहे.
सकाळी ६ ते रात्री १० वाहतुकीस परवानगी
पोलीस उपायुक्त (वाहतूक) अमोल झेंडे यांनी जारी केलेल्या आदेशानुसार, ११ ऑक्टोबर २०२५ पासून पुढील आदेश येईपर्यंत दररोज सकाळी ६ ते रात्री १० वाजेपर्यंत भिडे पुलावरून वाहनांना प्रवास करण्यास परवानगी असेल. हा निर्णय डेक्कन आणि विश्रामबाग परिसरातील वाढत्या वाहतुकीचा ताण कमी करून वाहतूक सुरळीत करण्याच्या उद्देशाने घेण्यात आला आहे.
हेही वाचा – Pune Water Cut: पुणेकरांनो पाणी जपून वापरा! गुरुवारी शहरातील ‘या’ भागातील पाणी पुरवठा राहणार बंद
कायदेशीर अधिनियमांतर्गत आदेश जारी
ही परवानगी मोटार वाहन कायद्याच्या कलम ११५, ११६(१)(अ)(ब), ११६(४) आणि ११७ अंतर्गत देण्यात आली आहे. अधिकाऱ्यांनी सांगितले की, या उपाययोजनेमुळे सणासुदीच्या काळात वाढणाऱ्या खरेदी आणि उत्सवाच्या हालचालींमुळे होणारी वाहतूककोंडी टाळता येईल.
हेही वाचा – आमचा वेळ वाया जातो! TV वरील जाहिरातींमुळे त्रस्त पुणेरी आजींची थेट सुप्रिया सुळेंकडे तक्रार
वाहतूक निरीक्षणासाठी विशेष पथक
सुव्यवस्था राखण्यासाठी आणि अडथळे टाळण्यासाठी विश्रामबाग आणि डेक्कन वाहतूक विभागातील कर्मचारी पुलावरील वाहतुकीवर सतत लक्ष ठेवणार आहेत. या निर्णयाचे परिसरातील नागरिक, व्यापारी आणि प्रवाशांनी स्वागत केले आहे. यामुळे अनेकांनी गेल्या काही आठवड्यांपासून सुरू असलेल्या वळण मार्गांच्या त्रासातून दिलासा मिळेल अशी प्रतिक्रिया दिली आहे.
