पुणे: शहरातील कोंढवा परिसरात मध्यरात्री एटीएस (अँटी टेररिस्ट स्क्वॉड)ने व्यापक शोधमोहीम राबवली. पुणे पोलिसांच्या सहकार्याने एकाच वेळी तब्बल १८ ठिकाणी धडक कारवाई करण्यात आली. अचानक झालेल्या या ऑपरेशनमुळे केवळ पुणेच नव्हे, तर संपूर्ण राज्यात आणि देशभरात खळबळ उडाली आहे.
संशयितांची चौकशी सुरू
या सर्च ऑपरेशनदरम्यान काही संशयितांना एटीएसच्या ताब्यात घेण्यात आलं असून त्यांची कसून चौकशी सुरू आहे. मात्र, कारवाई अद्याप सुरू असल्याने अधिकृत पातळीवर कोणतीही माहिती पोलिसांकडून देण्यात आलेली नाही. अधिकाऱ्यांनी एवढंच स्पष्ट केलं की, ही कारवाई विविध सुरक्षा यंत्रणांच्या संयुक्त प्रयत्नातून पार पडत आहे. तपास पूर्ण झाल्यानंतरच संपूर्ण माहिती अधिकृतरीत्या जाहीर केली जाईल.
कोंढवा परिसर पुन्हा रडारवर
गेल्या काही वर्षांत कोंढवा परिसरात एटीएसच्या कारवायांचे प्रमाण वाढले आहे. याच भागातून दोन वर्षांपूर्वी बंदी घालण्यात आलेल्या एका दहशतवादी संघटनेच्या तीन सदस्यांना अटक करण्यात आली होती. या कारवाईत एका मोठ्या दहशतवादी कटाचा पर्दाफाश झाल्याचं समोर आलं होतं.
हेही वाचा – Pune Water Cut: पुणेकरांनो पाणी जपून वापरा! गुरुवारी शहरातील ‘या’ भागातील पाणी पुरवठा राहणार बंद
अलीकडे पुन्हा काही संशयास्पद हालचालींची माहिती मिळाल्यानंतर तपास यंत्रणांनी मध्यरात्रीपासून ही शोधमोहीम सुरू केली. नेमके किती जणांना ताब्यात घेण्यात आलं किंवा त्यांच्याकडे काय संशयास्पद साहित्य मिळालं, याबाबत अद्याप कोणतीही अधिकृत पुष्टी झालेली नाही. पोलिस सूत्रांच्या माहितीनुसार, चौकशीनंतर सर्व माहिती सार्वजनिक केली जाणार आहे.
