मुंबई: एसटी बँकेच्या संचालक मंडळाच्या बैठकीत मोठा राडा झाल्याची माहिती समोर आहे. वकील गुणरत्न सदावर्ते आणि उपमुख्यमंत्री एकनाथ शिंदे यांच्या शिवसेनेच्या कार्यकर्त्यांमध्ये मोठा राडा झाला आहे. सुरूवातीला वाद होता त्यानंतर दोन्ही गटाच्या कार्यकर्त्यांमध्ये मोठी हाणामारी झाली. या प्रकरणी नागपाडा पोलीस ठाण्यात गुन्हा दाखल करण्यात आला आहे. भ्रष्टाचार आणि अश्लील वर्तवणूकीच्या आरोपांवरुन हा वाद होता ज्यात बाहेरुन माणसं बोलावून मारहाण केल्याचा आरोप दोन्ही संघटनांकडून करण्यात आला आहे.
या बैठकीचा एक व्हिडीओ समोर आला आहे. ज्यात एक व्यक्ती संचालक मंडळाच्या बैठकीचा व्हिडीओ काढण्यास विरोध करत आहे. बैठकीतील माहिती बाहेर जाता कामा नये, असं ती व्यक्ती म्हणते. त्याला समोरची व्यक्ती विरोध करते तेव्हा बोलणाऱ्या व्यक्तीच्या बाजूची व्यक्ती अत्यंत तावातावात उठते आणि थेट बाटली फेकून मारतो. यानंतर संबंधित व्यक्ती समोरच्या बाजूला बसलेल्या लोकांच्या दिशेला जाते. यावेळी दोन्ही गटांमध्ये हाणामारी सुरु होते. यावेळी प्रचंड शिवीगाळ देखील करण्यात आली. व्हायरल व्हिडीओमध्ये हा गदारोळ बघायला मिळत आहे.
नेमकं काय घडलं?
मुंबई एसटी बँकेच्या संचालक मंडळाची बैठक आज पार पडली. या बैठकीत गुणरत्न सदावर्ते यांच्या पॅनलचे सर्व संचालक आणि शिवसेनेचे नेते आनंदराव अडसूळ यांच्या पॅनलचे सर्व संचालक उपस्थित होते. या बैठकीत दोन्ही पक्षांनी एकमेकांवर भ्रष्टाचार आणि अश्लील वर्तवणूकीचे आरोप केले. सुरूवातील सदावर्ते यांच्या पॅनलच्या व्यक्तीने आमच्या महिला कर्मचाऱ्याशी अश्लील वर्तन केल्याचा आरोप करत अडसूळ यांच्या संचालकांच्या दिशेला बॉटल फेकून मारली. यानंतर या बैठकीत मोठा राडा झाला. या घटनेत पाच ते सहा जण जखमी झाल्याची माहिती आहे.
सदावर्ते गटावर गंभीर आरोप
या घटनेनंतर एक पत्रक प्रसिद्ध करण्यात आलं आहे. त्यामध्ये या घटनेबाबत थोडक्यात माहिती देण्यात आली आहे. “एसटी को-ऑपरेटिव बँक ही एसटी कर्मचाऱ्यांच्या घामाच्या पैशावर चालणारी आशिया खंडातील सगळ्यात मोठी को-ऑपरेटिव्ह बँक म्हणून ओळखली जात होती. परंतु सध्या ह्या बँकेबाबत नेहमीच काही ना काही विचित्र ऐकायला येते. भ्रष्टाचाराच्या विळख्यात अडकलेले संचालक मंडळ कामगारांच्या मेहनतीच्या पैशांवर मौज करत आहे. याचे अनेक उदाहरणे आजवर आपण बघितलेत“, असं पत्रकात म्हटलं आहे.
“आज एसटी को-ऑपरेटिव्ह बँकेच्या संचालक मंडळाची मीटिंग घेण्यात आली. त्यात अडसूळ गटातील संचालकांनी सदावर्ते गटातील संचालकांनी बँकेत चालवलेला भ्रष्टाचार बाहेर काढल्याने या मीटिंगमध्ये अक्षरश: फ्रीस्टाइल मारामारी बघायला मिळाली. संचालक मंडळाच्या सदावर्ते गटाने अक्षरशः बाहेरून बाया बोलवून त्यांच्या हातून संचालक मंडळाच्या अडसूळ गटाला तुफान मारहाण केली, शिव्यांचा अक्षरशः पाऊसच पडला, कपडे फाडले, लाथा बुक्क्यांनी तुडवले. संचालकांचा हा राडा आता पोलीस स्टेशनपर्यंत गेला असून पुढील कारवाई चालू आहे. अशा संचालकांच्या हाती एसटी बँक देऊन एसटीचे सभासद आता पश्चाताप करत आहेत”, असंदेखील या प्रसिद्धी पत्रकात म्हटलं आहे.
