President Draupadi Murmu Security Lapse: राष्ट्रपती द्रौपदी मुर्मू यांच्या सुरक्षेत गंभीर त्रुटी समोर आली आहे. बुधवारी (२२ ऑक्टोबर) शबरीमला यात्रेसाठी निघालेल्या राष्ट्रपतींच्या हेलिकॉप्टरला केरळमधील एका नव्याने तयार केलेल्या हेलिपॅडवर उतरवताना तांत्रिक अडचणींना सामोरे जावे लागले. हेलिकॉप्टरची चाके हेलिपॅडवरील न सुकलेल्या काँक्रीटमध्ये अडकली, ज्यामुळे थोडा वेळ गोंधळाचे वातावरण निर्माण झाले.
सूत्रांच्या माहितीनुसार, राष्ट्रपतींच्या भेटीच्या पूर्वसंध्येला म्हणजेच मंगळवारी (२१ ऑक्टोबर) संध्याकाळी हेलिपॅड बांधण्याचा निर्णय घेण्यात आला. रात्रीतून तातडीने काँक्रीट ओतण्याचे काम सुरू करण्यात आले आणि बुधवारी सकाळपर्यंत हेलिपॅड तयार करण्यात आले. मात्र, काँक्रीट पूर्णपणे सुकले नसल्याचा राज्य गुप्तचर विभागाने आधीच इशारा दिला होता. तरीही हेलिकॉप्टर उतरण्याचा निर्णय घेण्यात आला आणि परिणामी चाके ओलसर पृष्ठभागात अडकली.
या घटनेनंतर पोलिस आणि अग्निशमन दलाने तत्काळ कारवाई करत हेलिकॉप्टर सुरक्षितपणे बाहेर काढले. सुदैवाने, या घटनेत राष्ट्रपती मुर्मू आणि त्यांच्यासोबत असलेले सर्व अधिकारी सुरक्षित आहेत. अधिकाऱ्यांच्या म्हणण्यानुसार, काही मिनिटांतच हेलिकॉप्टर पुन्हा सामान्य स्थितीत आणण्यात आले.
दरम्यान, या संपूर्ण प्रकरणामुळे सुरक्षा व्यवस्थेतील त्रुटींवर प्रश्नचिन्ह उभे राहिले आहे. राष्ट्रपतींचा प्रवास रस्त्याने की हवाई मार्गाने होणार हे पहाटे ४ वाजेपर्यंत निश्चित झाले नव्हते. त्यामुळे सुरक्षेच्या दृष्टीने तयारी अपुरी राहिल्याचे अधिकाऱ्यांनी मान्य केले आहे. राष्ट्रपती द्रौपदी मुर्मू आज शबरीमला येथील भगवान अय्यप्पा मंदिरात पूजा करणार असून त्या या पवित्र मंदिरात पूजा करणाऱ्या पहिल्या महिला राष्ट्रप्रमुख ठरणार आहेत.
