Umesh Shelke Nagpur police : साताऱ्यातील फलटण प्रकरणाने महाराष्ट्र हादरला असताना, आता नागपूरमध्येही खाकीवरील विश्वासघाताची धक्कादायक घटना समोर आली आहे. एका २३ वर्षीय तरुणीने नागपूर पोलीस दलातील कर्मचारी उमेश शेळके यांच्यावर लग्नाचे आमिष दाखवून लैंगिक शोषण केल्याचा गंभीर आरोप केला आहे. या प्रकरणाने उपराजधानीतील पोलिस दलात खळबळ उडाली असून, पीडित तरुणीने कारवाईत विलंब झाल्याचा आरोप करत न्यायाची मागणी केली आहे.
नेमकं प्रकरण काय?
मिळालेल्या माहितीनुसार, उमेश शेळके हे नागपूर पोलीस दलातील कर्मचारी असून, त्याने लग्नाचे खोटे आमिष दाखवून पीडित तरुणीला विश्वासात घेतले. यानंतर अनेकदा शारीरिक शोषण केल्याचा आरोप आहे. पीडित २३ वर्षीय तरुणीने तीन आठवड्यांपूर्वी कपिलनगर पोलीस स्टेशनमध्ये तक्रार दाखल केली. तिच्या तक्रारीवर आधारित लैंगिक शोषणाचा गुन्हा दाखल करण्यात आला आहे. मात्र, गुन्हा नोंदवून घेतल्यानंतरही आरोपी शेळके विरोधात ठोस कारवाई झालेली नाही, असा दावा पीडित तरुणीने केला आहे.
आरोपी फरार, पोलिसांकडून तपास सुरू
दुसरीकडे, पोलिसांकडून सांगितले जाते की, उमेश शेळके तीन आठवड्यांपासून फरार आहे आणि त्याचा शोध घेतला जात आहे. नागपूर पोलीस या प्रकरणाचा सखोल तपास करत असून, किती तथ्य आहे याची खात्री करण्यासाठी प्रयत्न सुरू आहेत.
ही घटना फलटणमधील महिला डॉक्टरवर पोलिस अधिकाऱ्याकडून झालेल्या अत्याचाराच्या प्रकरणानंतर घडली असल्याने राज्यभर संतापाची लाट उसळली आहे. फलटण प्रकरणात पीएसआय बदने यांच्यावर बलात्कार व मानसिक त्रास देण्याचे आरोप आहेत, ज्यात पीडित डॉक्टरने आत्महत्या करण्यापूर्वी त्यांचे नाव हातावर लिहिले होते.
