Father Kills Daughter: शिक्षण हे संस्कारांसाठी असते, पण फरिदाबादमध्ये शिक्षणाच्या नावाखाली एका निर्दयी पित्याने नात्याला काळिमा फासणारी घटना घडवली आहे. अवघ्या ४ वर्षांच्या चिमुकलीला १ ते ५० पर्यंत अंक मोजता आणि लिहिता आले नाहीत, या क्षुल्लक कारणावरून संतापलेल्या बापाने तिला इतकी अमानुष मारहाण केली की, त्या निरागस जिवाचा जागीच अंत झाला. २१ जानेवारीला घडलेल्या या घटनेचे थरारक वास्तव पोलीस तपासात समोर आले आहे.
बापाचा ‘क्रूर’ अवतार
आरोपीचे नाव कृष्णा जयस्वाल (वय ३१) असून तो मूळचा उत्तर प्रदेशातील आहे. आपल्या कुटुंबाचा उदरनिर्वाह करण्यासाठी त्याची पत्नी एका खाजगी कंपनीत कामाला जाते, तर कृष्णा घरी राहून मुलांची देखभाल करत असे. घटनेच्या दिवशी तो मुलीचा ‘अभ्यास’ घेत होता. त्याने तिला १ ते ५० पर्यंतचे अंक कागदावर लिहिण्यास सांगितले. मात्र, चिमुकलीला ते न जमल्याने कृष्णाचा संयम सुटला आणि त्याने हैवानियत दाखवत पोटच्या गोळ्याला बेदम मारहाण करण्यास सुरुवात केली.
हेही वाचा – Pune Crime: चारित्र्याचा संशय अन् हुंड्याची हाव! विवाहितेला चामड्याच्या पट्ट्याने अमानुष मारहाण
घटनेतील हृदयद्रावक वास्तव
बापाने चिमुकलीला इतक्या जोरात मारले की तिच्या डोक्याला आणि शरीराच्या नाजूक भागांना गंभीर जखमा झाल्या. मार सहन न झाल्याने ती चिमुरडी बेशुद्ध पडली आणि ज्या वडिलांच्या मांडीवर तिने खेळायला हवे होते, त्याच मांडीवर तिने शेवटचा श्वास घेतला. सायंकाळी आई कामावरून घरी परतली तेव्हा तिला मुलगी निर्जीव अवस्थेत दिसली. आपल्या पोटच्या पोरीचा असा अंत पाहून आईने फोडलेली किंकाळी ऐकून परिसरातील नागरिकांचेही डोळे पाणावले.
आरोपीला कोठडी, परिसरात संताप
मुलीच्या आईने तत्काळ पोलिसांना माहिती दिली. पोलिसांनी घटनास्थळी धाव घेत मृतदेह ताब्यात घेतला. शवविच्छेदन अहवालात मुलीच्या शरीरावर मारहाणीच्या खुणा स्पष्टपणे दिसून आल्या आहेत. पोलिसांनी आरोपी कृष्णा जयस्वालला बेड्या ठोकल्या असून न्यायालयाने त्याला पोलीस कोठडी सुनावली आहे. आरोपी यापूर्वीही मुलीला अशाच प्रकारे मारहाण करायचा का, याचा तपास पोलीस करत आहेत. एका निष्पाप मुलीचा केवळ शिक्षणाच्या अट्टाहासापोटी बळी गेल्याने संपूर्ण फरिदाबादमध्ये हळहळ व्यक्त होत असून, अशा नराधम बापावर कठोर कारवाई करण्याची मागणी होत आहे.
