Pune Crime: बांधकामाच्या कारणावरून झालेल्या वादाचे रूपांतर जीवघेण्या हल्ल्यात झाल्याची धक्कादायक घटना खेड तालुक्यातील वडगाव घेनंद येथे घडली आहे. शेतातील कंपाउंडचे काम सुरू असताना एका तरुणाला लाकडी काठीने मारहाण करून थेट विहिरीत ढकलून देण्यात आले. सुदैवाने, नातेवाईकांच्या सतर्कतेमुळे मोठा अनर्थ टळला असून पीडित तरुण थोडक्यात बचावला आहे.
नेमका प्रकार काय?
मिळालेल्या माहितीनुसार, ३३ वर्षीय पीडित तरुण आपल्या शेतात कंपाउंड घालण्याचे काम करत होता. बुधवारी (२१ जानेवारी) सायंकाळी ७ च्या सुमारास आरोपी चारचाकी गाडीतून तिथे पोहोचला. “कोणाला विचारून हे काम सुरू केले?” असा जाब विचारत त्याने हुज्जत घालण्यास सुरुवात केली. वाद विकोपाला गेल्यावर आरोपीने लाकडी दांडक्याने तरुणाच्या जबड्यावर जोरदार प्रहार केला. आरोपीने “थांब तुला ठारच मारतो,” अशी गर्जना करत तरुणाला शेजारीच असलेल्या खोल विहिरीत जोरात ढकलून दिले. तरुण विहिरीत पडताच त्याने आरडाओरडा केला. जवळच असलेल्या त्याच्या नातेवाईकांनी तत्काळ विहिरीकडे धाव घेतली आणि त्याला सुखरूप बाहेर काढले.
हेही वाचा – Pune Crime: चारित्र्याचा संशय अन् हुंड्याची हाव! विवाहितेला चामड्याच्या पट्ट्याने अमानुष मारहाण
जबड्याला गंभीर दुखापत, पोलिसांत गुन्हा दाखल
या भयंकर हल्ल्यात तरुणाच्या जबड्याला गंभीर इजा झाली असून त्याच्यावर उपचार सुरू आहेत. याप्रकरणी पीडित तरुणाने दिलेल्या तक्रारीवरून चाकण दक्षिण पोलीस ठाण्यात आरोपीविरुद्ध ‘खुनाचा प्रयत्न’ केल्याचा गुन्हा दाखल करण्यात आला आहे.
पोलीस तपास सुरू
चाकण पोलिसांनी या घटनेची गंभीर दखल घेतली असून फरार आरोपीचा शोध सुरू आहे. किरकोळ कारणावरून एखाद्याचा जीव घेण्यापर्यंत आरोपीची मजल गेल्याने परिसरात दहशतीचे वातावरण आहे. वरिष्ठ पोलीस अधिकाऱ्यांच्या मार्गदर्शनाखाली पुढील तपास केला जात आहे.
