Pune Crime: पुण्यातील उच्चभ्रू समजल्या जाणाऱ्या कोरेगाव पार्क परिसरातून महिलांच्या सुरक्षेचा प्रश्न ऐरणीवर आणणारी एक धक्कादायक घटना उघडकीस आली आहे. मुंढवा-कोरेगाव पार्क रस्त्यावर एका नराधमाने ओळखीचा फायदा घेत धावत्या कारमध्ये एका महिलेवर लैंगिक अत्याचार केल्याची घटना घडली आहे. या प्रकरणी कोरेगाव पार्क पोलीस ठाण्यात गुन्हा दाखल करण्यात आला असून संपूर्ण शहरात संताप व्यक्त होत आहे.
नेमकी घटना काय?
मिळालेल्या माहितीनुसार, पीडित महिला कोरेगाव पार्क परिसरातील एका प्रसिद्ध हॉटेलमध्ये पार्टीसाठी आली होती. याच ठिकाणी तिची ओळख आरोपी पुरुषाशी झाली. पार्टी संपल्यानंतर रात्री उशिरा हॉटेलमधून बाहेर पडताना, ‘मी तुला सुरक्षित घरी सोडतो’ असे सांगून आरोपीने महिलेला आपल्या कारमध्ये बसवले. मात्र, घरी सोडण्याऐवजी त्याने मुंढवा-कोरेगाव पार्क रस्त्यावरील निर्जनस्थळी धावत्या कारमध्येच महिलेवर अत्याचार केला.
पोलिसांकडून आरोपीचा शोध सुरू
या घटनेनंतर पीडित महिलेने तात्काळ पोलिसांत धाव घेत तक्रार नोंदवली. कोरेगाव पार्क पोलिसांनी या प्रकरणाची गंभीर दखल घेतली असून गुन्हा दाखल केला आहे. पोलिसांकडून सध्या हॉटेल परिसरातील आणि रस्त्यांवरील सीसीटीव्ही (CCTV) फुटेजची तपासणी केली जात आहे. तसेच तांत्रिक पुराव्यांच्या आधारे आरोपीला पकडण्यासाठी पथके रवाना करण्यात आली आहेत.
महिलांच्या सुरक्षेचा प्रश्न पुन्हा ऐरणीवर
पुण्यात गेल्या काही दिवसांपासून महिलांवरील अत्याचाराच्या घटनांमध्ये वाढ झाली आहे. भोर तालुक्यातील नसरापूर येथील चिमुकलीवर झालेला अत्याचार आणि हत्येची घटना ताजी असतानाच, कोरेगाव पार्कमध्ये घडलेल्या या प्रकारामुळे नागरिकांमध्ये तीव्र संताप व्यक्त केला जात आहे. रात्रीच्या वेळी एकट्या प्रवास करणाऱ्या महिलांच्या सुरक्षेबाबत आता पुन्हा एकदा प्रश्नचिन्ह उपस्थित केले जात आहे.
