Abortion Pill Overdose: धुळे शहरातील मोहाडी पोलीस ठाण्याच्या हद्दीत एक अत्यंत धक्कादायक आणि हृदयद्रावक घटना उघडकीस आली आहे. अविवाहित असताना राहिलेले गरोदरपण लपवण्यासाठी गर्भपाताच्या गोळ्यांचे अतिसेवन केल्याने एका १८ वर्षीय तरुणीला आपला जीव गमवावा लागला आहे. या घटनेमुळे संपूर्ण धुळे परिसरात मोठी खळबळ उडाली असून अवैध गर्भपाताचा प्रश्न पुन्हा ऐरणीवर आला आहे.
नेमका प्रकार काय घडला?
धुळे शहरालगतच्या एका गावातील १८ वर्षीय तरुणीची प्रकृती अचानक खालावल्याने तिला देवपूर भागातील एका खासगी रुग्णालयात दाखल करण्यात आले होते. डॉक्टरांनी तिची वैद्यकीय तपासणी केली असता, ती २४ आठवड्यांची (सहा महिने) गरोदर असल्याचे समोर आले. इतक्या प्रगत अवस्थेतील गर्भ पाडण्यासाठी तिने काही तीव्र औषधांचे किंवा गोळ्यांचे सेवन केले होते, ज्यामुळे तिची प्रकृती वेगाने बिघडली.
रक्तदाब घटला अन् झटके आले
औषधांच्या ओव्हरडोजमुळे तरुणीचा रक्तदाब (Blood Pressure) अत्यंत खालच्या पातळीवर गेला आणि तिला तीव्र झटके येऊ लागले. खासगी डॉक्टरांच्या सल्ल्यानुसार तिला तातडीने हिरे शासकीय रुग्णालयात हलवण्यात आले. तेथील अतिदक्षता विभागात (ICU) डॉक्टरांनी तिला वाचवण्याचे शर्थीचे प्रयत्न केले, मात्र उपचारांना प्रतिसाद न मिळाल्याने अखेर तिची प्राणज्योत मालवली.
पोलिसांसमोर तपासाचे आव्हान
याप्रकरणी मोहाडी पोलिसांनी सध्या ‘अकस्मात मृत्यू’ची नोंद केली आहे. मात्र, या मृत्यूने अनेक गंभीर प्रश्न उपस्थित केले आहेत. ६ महिन्यांचा गर्भ असताना इतक्या घातक गोळ्या तरुणीला कोणी उपलब्ध करून दिल्या? यामागे गर्भपाताच्या गोळ्या बेकायदेशीरपणे विकणारे एखादे रॅकेट सक्रिय आहे का? त्या तरुणीला या स्थितीत ढकलणारा तो तरुण कोण होता? पोलीस आता या सर्व बाबींचा तांत्रिक तपास करत असून, तरुणीच्या संपर्कात असलेल्या संशयितांची चौकशी केली जाण्याची शक्यता आहे.
