Pune Nasrapur Case: नसरापूर येथील अल्पवयीन मुलीवरील अत्याचार आणि हत्या प्रकरणात आरोपी भीमराव कांबळे याच्याविरोधातील न्यायालयीन प्रक्रियेला वेग आला असून, अवघ्या २८ दिवसांत महत्त्वाची कारवाई पूर्ण करण्यात आली आहे. गुरुवारी विशेष न्यायालयात झालेल्या सुनावणीत आरोपीवर गंभीर आरोप निश्चित करण्यात आले. त्यामुळे आता या प्रकरणाच्या पुढील सुनावणीचा मार्ग मोकळा झाला आहे.
न्यायालयात महत्त्वाची सुनावणी
या प्रकरणाची सुनावणी फास्ट ट्रॅक विशेष न्यायालयात पार पडली. सुनावणीदरम्यान पोलिसांनी पोस्टमार्टम अहवालासह विविध वैद्यकीय तपासण्यांचे अहवाल न्यायालयात सादर केले. दोन्ही बाजूंनी जोरदार युक्तिवाद करण्यात आला. मात्र, आरोपीच्या बाजूने कोणताही ठोस पुरावा सादर करण्यात अपयश आल्याने न्यायालयाने भीमराव कांबळे याच्याविरोधातील आरोप निश्चित केले.
१५ दिवसांत चार्जशीट दाखल
या प्रकरणाचा तपास वेगाने पूर्ण करत पोलिसांनी अवघ्या १५ दिवसांत न्यायालयात दोषारोपपत्र दाखल केले होते. त्यानंतर आता केवळ २८ दिवसांत आरोप निश्चित होण्याची प्रक्रिया पूर्ण झाली आहे. या खटल्याची सुनावणी आता दररोज होणार असून ती ‘इन कॅमेरा’ पद्धतीने घेतली जाणार आहे.
वरिष्ठ अधिकारी न्यायालयात उपस्थित
या महत्त्वाच्या सुनावणीवेळी विशेष सरकारी वकील ॲड. अजय मिसर, तक्रारदार पक्षाचे वकील, पुणे ग्रामीणचे पोलीस अधीक्षक संदीपसिंह गिल तसेच तपास अधिकारी न्यायालयात उपस्थित होते. पोलिसांनी या प्रकरणात जलद गतीने तपास करत पुरावे गोळा केल्याची माहिती सूत्रांनी दिली.
गंभीर कलमांखाली गुन्हे दाखल
आरोपी भीमराव कांबळे याच्यावर ‘भारतीय न्याय संहिता २०२३’ अंतर्गत विविध गंभीर कलमांखाली गुन्हे दाखल करण्यात आले आहेत. तसेच ‘पोक्सो’ कायद्यांतर्गतही त्याच्यावर लैंगिक अत्याचारासंदर्भातील गंभीर आरोप ठेवण्यात आले आहेत. आता न्यायालयाने हे सर्व आरोप निश्चित केल्याने पुढील सुनावणीकडे सर्वांचे लक्ष लागले आहे.
