Rupali Chakankar ED Inquiry : भोंदू बाबा अशोक खरात प्रकरणामुळे राजकीय वर्तुळात मोठी खळबळ उडाली आहे. राज्य महिला आयोगाच्या माजी अध्यक्षा आणि राष्ट्रवादी काँग्रेसच्या नेत्या रुपाली चाकणकर यांच्या अडचणीत दिवसेंदिवस वाढ होताना दिसत आहे. कालच एसआयटीने (SIT) त्यांची ६ तास कसून चौकशी केल्यानंतर, आता अंमलबजावणी संचालनालयाने (ED) त्यांना समन्स बजावले आहे.
मनी लॉन्ड्रिंगचा संशय; ईडीच्या रडारवर चाकणकर
अशोक खरात प्रकरणातील संशयास्पद आर्थिक व्यवहार आणि मनी लॉन्ड्रिंगच्या कोनातून ‘ईडी’ आता तपास करणार आहे. याच आठवड्यात चाकणकर यांना चौकशीसाठी हजर राहण्याचे आदेश देण्यात आले आहेत. विशेष म्हणजे, यापूर्वी याच प्रकरणात रूपाली चाकणकर यांच्या बहिणीचीही ईडीकडून चौकशी करण्यात आली होती. एसआयटी प्रमुख तेजस्वी सातपुते यांनी कालच चाकणकर यांची प्रदीर्घ चौकशी केली होती, त्यापाठोपाठ आता केंद्रीय यंत्रणेने चौकशीचा ससेमिरा लावल्याने प्रकरणाला वेगळे वळण मिळाले आहे.
कल्पना खरात यांचा जामीन अर्ज लटकला
दुसरीकडे, अशोक खरात यांची पत्नी कल्पना खरात यांच्यावरही अटकेची टांगती तलवार कायम आहे. शिर्डी येथील जमीन फसवणूक आणि बेकायदेशीर सावकारी प्रकरणात कल्पना खरात यांनी अटकपूर्व जामीन मिळवण्यासाठी उच्च न्यायालयाच्या औरंगाबाद खंडपीठात धाव घेतली होती. मात्र, उच्च न्यायालयाने या अर्जावरील सुनावणी तहकूब केली आहे. आता या प्रकरणावर मे महिन्याच्या अखेरच्या आठवड्यात (२५ मे ते ३० मे दरम्यान) सुनावणी होण्याची शक्यता आहे. रूपाली चाकणकर यांना ईडीने बजावलेल्या समन्समुळे आता या प्रकरणाचे धागेदोरे नेमके कुठपर्यंत पोहोचले आहेत, हे पाहणे महत्त्वाचे ठरेल.
