बीड : मस्साजोगचे सरपंच संतोष देशमुख हत्या प्रकरणात अटकेतील आरोपींवर यापूर्वी गंभीर गुन्हे दाखल असल्याचे सीआयडी पोलीस तपासात समोर आले आहे. मुख्य आरोपी सुदर्शन घुलेविरुद्ध १९ गुन्ह्यांची नोंद आहे. सीआयडी पोलीस कोठडीत आता त्याच्यासह इतर आरोपींची हत्या आणि खंडणीच्या गुन्ह्यात कसून चौकशी सुरू असताना आता या आरोपींच्या गुन्हेगारी पार्श्वभूमी समोर आली आहे.
सरपंच संतोष देशमुख यांची ९ डिसेंबर रोजी अपहरण करून हत्या करण्यात आली होती. या प्रकरणात सुदर्शन घुले, सुधीर सांगळे, कृष्णा आंधळे, महेश केदार, प्रतीक घुले, जयराम चाटे व विष्णू चाटे यांच्याविरुद्ध केज पोलीस ठाण्यात गुन्ह दाखल आहे. सध्या कृष्णा आंधळे वगळता इतर सर्व सीआयडी कोठडीत आरोपी आहेत. वाल्मिक कराड पुण्यात सीआयडी कार्यालयात शरण आला, तर इतर आरोपींना स्थानिक गुन्हे शाखेच्या पथकांनी विविध ठिकाणाहून गजाआड केले आहे. याच प्रकरणात संतोष देशमुख यांचे लोकेशन दिल्याचा आरोप असलेल्या संशयित सिद्धार्थ सोनवणे यालाही कल्याणमधून अटक केल्यानंतर त्याची आता सीआयडी पोलीस कोठडीत रवानगी करण्यात आली आहे.
दरम्यान, अटकेतील आरोपींची गुन्हेगारी पार्श्वभूमी समोर आली आहे. सुदर्शन घुलेविरुद्ध १९ गुन्हे दाखल आहेत, तर वाल्मिक कराडविरुद्ध १५, कृष्णा आंधळे ६, सुधीर सांगळे व विष्णू चाटे यांच्याविरुद्ध प्रत्येकी ३, तसेच महेश केदारविरुद्ध ६, प्रतीक घुलेविरुद्ध ५ व जयराम चाटेविरुद्ध ३ गुन्ह्यांची नोंद असल्याची माहिती तपासातून पुढे आल्याचे सूत्रांनी सांगितले. दरम्यान, सीआयडी कोठडीत तपास यंत्रणाकडून गुन्ह्याच्या अनुषंगाने या आरोपींची कसून चौकशी केली जात आहे.
