पुणे: पुणे शहरातील गुन्हेगारी वाढत असल्याने जिल्ह्यात शांतता राखण्यासाठी पोलिसांवर मोठा ताण पडला आहे. सामान्य नागरिक गुन्हेगारांमुळे मोठे चिंतेत आहेत. गुन्हेगार आता सामान्य नागरिकांबरोबरच पोलिसांनाही लक्ष्य करत आहेत. नुकतंच काही दिवसांपूर्वी एका पोलिसाला मारहाण झाली. त्यामुळे गुन्हेगारांची वाढती मजल मोडीत काढण्याचे मोठे आव्हान आता पोलीसांसमोर आहे.
मार्केट यार्ड परिसरात पुन्हा अशीच घटना घडली. वाहतूक नियंत्रण करत असताना हवालदारावर ट्रक चालक व त्याच्या साथीदारांनी हल्ला केल्याच्या धक्कादायक प्रकार समोर आला. पोलिसांनी तत्काळ कारवाई करत तिघांना अटक केली आहे.
अटक केलेल्यांमध्ये सुमीत सुभाष सरकटे, अक्षय नानासाहेब शिंदे आणि मनजीत सुभाष कांबळे यांचा नावाचा समावेश आहेत. या प्रकरणात हवालदार महेश सुभाष साळुंखे यांनी फिर्याद दाखल केली असून ते बंडगार्डन पोलीस ठाण्यात कार्यरत आहेत.
मिळालेल्या माहितीनुसार, गुरुवारी (ता. 17) रात्री साडेदहाच्या सुमारास हवालदार साळुंखे हे ड्युटी संपवून घरी जात होते. त्यावेळी मार्केट यार्डातील वखार महामंडळ चौकाजवळून एक ट्रक प्रचंड वेगाने जात असल्याचे त्यांच्या निदर्शनास आले. अपघात होण्याची शक्यता ओळखून त्यांनी तत्परतेने ट्रकला प्रवेशद्वार क्रमांक 9 जवळ अडवले.
त्या वेळी आसपासच्या नागरिकांनी चालकाला मारण्याचा प्रयत्न केला, मात्र साळुंखे यांनी हस्तक्षेप करून जमावाला शांत केले. यानंतर ट्रकचालकाने आपल्या साथीदारांना बोलावून घेतले. काही वेळातच आरोपींनी साळुंखे यांच्यावर हल्ला चढवला. हातातील धातूच्या कड्याने त्यांच्या डोक्यावर मारहण केली. जखमी अवस्थेतही साळुंखे यांनी तत्काळ नियंत्रण कक्षाशी संपर्क साधला. त्यानंतर त्यांना उपचारासाठी ससून रुग्णालयात दाखल करण्यात आले.
