Gokul Controversy: गोकुळ दूध संघातील डिबेंचरच्या रकमेवरून पेटलेला वाद आता अधिक चिघळला आहे. संचालिका शौमिका महाडिक यांनी डिबेंचर संदर्भात मोर्चा काढल्यानंतर काँग्रेसचे आमदार सतेज पाटील यांनी नाव न घेता टीका करत आम्ही गोकुळमध्ये सत्ता घेऊन कुणाच्याही जावयाला मोठं केलं नाही असा टोला लगावला होता. या वक्तव्याचा प्रतिकार करत महाडिक गटाने आता थेट पलटवार केला आहे. महाडिक गटाचे कार्यकर्ते प्रताप पाटील कावणेकर यांनी पत्रकार परिषद घेऊन सतेज पाटील यांच्यावर तीव्र निशाणा साधला. ते म्हणाले, महाडिक यांच्या जावयाची इतकी ऍलर्जी होती तर पुन्हा वाढीव दराने त्यांनाच ठेका का दिला? सत्ता असताना पाच वर्षे ठेका रद्द का केला नाही? चांगलं काम होतं म्हणूनच पुन्हा ठेका दिलात, मग आता आक्षेप का?
हेही वाचा – Kolhapur ZP Ward Reservation: कोल्हापूर झेडपीसाठी तालुकानिहाय गटांसाठी आरक्षण जाहीर
दरम्यान, डिबेंचरचा मुद्दा दिवाळीनंतर पुन्हा पेटणार असल्याचे संकेत देण्यात आले आहेत. शौमिका महाडिक यांच्या नेतृत्वाखाली कार्यकर्त्यांची लवकरच बैठक होणार असून पुढील आंदोलनाची दिशा ठरवली जाणार आहे. माजी संचालक विश्वास जाधव यांनी पत्रकार परिषदेत सांगितले की, डिबेंचरचा मुद्दा वसूबारसच्या कार्यक्रमात राजकीय रंग देऊन बाजूला सारला गेला. आम्ही फक्त आमच्या हक्काची मागणी करतोय. गेल्या दहा वर्षांत इतकी मोठी रक्कम कधीही कपात झाली नव्हती. त्यामुळे आमचा विरोध कायम आहे. जाधव यांनी पुढे सांगितले की, गोकुळच्या इतिहासात प्रथमच ४० टक्के डिबेंचर घेतला गेला आहे. तो निर्णय अन्यायकारक आहे. आम्ही सहकार विभागाकडे तक्रार दाखल करणार आहोत आणि गरज पडल्यास न्यायालयाचं दार ठोठावू.
महाडिक गटाची स्पष्ट भूमिका
महाडिक गटाने स्पष्ट केलं आहे की, हा राजकीय नव्हे तर आर्थिक न्यायाचा लढा आहे. शौमिका महाडिक या फक्त सदस्यांच्या हितासाठी उभ्या आहेत. दिवाळीनंतर सभासदांची मोठी बैठक घेऊन या प्रकरणावर अंतिम भूमिका निश्चित केली जाणार आहे. गोकुळमध्ये मिठाचा खडा पडू नये, पण मिठाची पोतीच शेजारी ठेवली आहेत, त्यामुळे दूध नासायला वेळ लागणार नाही, असं उपरोधिक विधान प्रताप पाटील यांनी सतेज पाटील यांच्या टीकेला उत्तर देताना केलं.
