पिंपरी चिंचवड : शहरातील चिंचवड परिसरात मध्यरात्री घडलेल्या घटनेने परिसर हादरला आहे. स्थानिक सामाजिक कार्यकर्ता नकुल भोईर यांचा त्यांच्या पत्नीनेच खून केल्याचा धक्कादायक प्रकार उघडकीस आला आहे. कौटुंबिक वादातून ही घटना घडल्याचे पोलिसांनी प्राथमिक तपासात स्पष्ट केले आहे. पोलिसांच्या माहितीनुसार, नकुल भोईर आणि त्यांची पत्नी चैताली यांच्यात गेल्या काही दिवसांपासून सतत भांडणं सुरू होती. पत्नीच्या चारित्र्यावर नकुल वारंवार संशय घेत असल्याने घरात तणावाचं वातावरण निर्माण होत होतं. गुरुवारी उशिरा पुन्हा एकदा वाद झाला आणि रागाच्या भरात चैतालीने ओढणीने पतीचा गळा आवळून खून केला. घटनेनंतर पोलिसांनी तातडीने घटनास्थळी धाव घेत आरोपी पत्नीला ताब्यात घेतलं आहे.
वादाचा शेवट खुनात
ही घटना मध्यरात्री दोनच्या सुमारास चिंचवड परिसरातील त्यांच्या राहत्या घरी घडली. दोघांमधील वाद विकोपाला गेल्याने चैतालीने अत्यंत संतापाच्या भरात पतीचा जीव घेतल्याचे तपासात समोर आले आहे. यावेळी त्यांची दोन लहान मुलं आतील खोलीत झोपलेली होती. बाहेरच्या खोलीत हा सर्व प्रकार घडला.
सामाजिक कार्यात सक्रिय नकुल भोईर
नकुल भोईर हे पिंपरी चिंचवडमधील ओळखलेले सामाजिक कार्यकर्ते होते. शरदचंद्र पवार गटाच्या राष्ट्रवादी काँग्रेस पक्षाशी त्यांचा संबंध होता. शहरातील नागरिकांच्या समस्या सोडवण्यासाठी ते नेहमी पुढाकार घेत असतं. विशेष म्हणजे, चैताली भोईर या आगामी महापालिका निवडणुकीत नगरसेवकपदासाठी इच्छुक होत्या. निवडणुकीची तयारी दोघेही मिळून करत होते. मात्र, याच वैवाहिक नात्यातील तणाव अखेर जीवघेणा ठरला.
प्राथमिक चौकशीनुसार, ही घटना पूर्णतः कौटुंबिक कारणातून घडल्याचं पोलिसांनी सांगितलं आहे. चैताली भोईरला अटक करण्यात आली असून तिची सखोल चौकशी सुरू आहे. नकुलभोईर यांचा मृतदेह शवविच्छेदनासाठी रुग्णालयात पाठवण्यात आला आहे. याप्रकरणी चिंचवड पोलिस ठाण्यात गुन्हा दाखल करण्याची प्रक्रिया सुरू असून, नेमका वाद कोणत्या कारणावरून तीव्र झाला आणि खून कसा घडला? याचा तपास सुरू आहे.
