मुंबई : बॉलिवूडमधून एक धक्कादायक बातमी समोर येत आहे. मॉडेल व अभिनेत्री शेफाली जरीवाला हिचे निधन झाले आहे. विरल भयानी यांच्या इंस्टाग्राम पोस्टमध्ये शेफालीच्या मृत्यूची माहिती शेअर करण्यात आली आहे. शेफाली मुंबईतील अंधेरी लोखंडवाला भागात राहत होती. अचानक रात्री ११ वाजण्याच्या सुमारास तिला छातीत दुखू लागल्याने पती परागने तिला ताबडतोब रुग्णालयात नेले. मात्र, तिच्यावर उपचार सुरू होण्यापूर्वीच डॉक्टरांनी तिला मृत घोषित केले.
समोर आलेल्या प्राथमिक माहितीनुसार, शेफालीचा मृत्यू हा हृदयविकाराच्या झटक्याने झाला असल्याचे समजत आहे. शेफालीच्या मेकअप आर्टिस्टने तिच्या मृत्यूची पुष्टी केली आहे. शेफालीच्या कुटुंबाकडून अद्यापही यावर अधिकृत विधान जारी करण्यात आलेले नाही. शेफाली फक्त ४२ वर्षांचीच होती. शेफालीच्या जाण्याने संपूर्ण बॉलिवूडला धक्का बसला असून, शोककळा पसरली आहे.
विरल बयानीने आपल्या पोस्टमध्ये लिहिले आहे की, ‘शेफालीला तिचा पती व इतर तिघांनी बेलेव्ह्यू मल्टीस्पेशालिटी हॉस्पिटलमध्ये नेले. रुग्णालयातील कर्मचाऱ्यांनी शेफालीचा रुग्णालयात पोहोचण्यापूर्वीच मृत्यू झाला असल्याचं सांगितले. रुग्णालयाच्या डॉक्टर यांनी या वृत्ताचे खंडन केले नाही मात्र, त्यांनी यावर कोणतीही माहिती देण्यास टाळले आहे. दरम्यान, शेफालीचा मृतदेह शवविच्छेदनासाठी कूपर रुग्णालयात पाठवण्यात आला असून, आज शेफालीवर मुंबईत अंत्यसंस्कार होणार आहेत.
शेफाली जरीवालाच्या निधनाच्या बातमीने चाहत्यांना धक्का बसला असून, अजूनही चाहत्यांना यावर विश्वास ठेवणे अवघड जात आहे. चाहते सोशल मीडियावर कमेंट करत असून, शोक व्यक्त करत आहे.
‘काटा लगा’ फेम अभिनेत्रीने काही काळापूर्वी लोकप्रिय रिअॅलिटी शो बिग बॉस देखील केला होता. तिने बिग बॉस १३ मध्ये दिवंगत अभिनेता सिद्धार्थ शुक्ला सोबत भाग घेतला होता. सिद्धार्थ शुक्लाचा देखील हृदयविकाराने अचानक निधन झाल्याने संपूर्ण बॉलिवूड हादरले होते. आता शेफालीसोबतही असेच काही घडले असून, चाहत्यांना तिच्या मृत्यूची बातमी पचवणे अवघड जात आहे.
दरम्यान, शेफालीच्या मृत्यूच्या बातमीनंतर, तिचा पती परागचा एक व्हिडिओही सोशल मीडियावर व्हायरल होत आहे, ज्यामध्ये तो गाडीत बसलेला दिसत आहे. या व्हिडिओमध्ये पराग खूप दुःखी दिसत आहे. या व्हिडिओच्या कमेंट सेक्शनमध्ये, शेफालीच्या मृत्यूच्या बातमीने युजर्सना धक्का बसला असून, युजर्सनी अभिनेत्रीच्या मृत्यूबद्दल शोक व्यक्त केला आहे.
