Pune liquor Tragedy : पिंपरी-चिंचवड आणि पुण्यात विषारी दारूमुळे झालेल्या मृत्यूप्रकरणानंतर संपूर्ण राज्यातील राजकीय आणि सामाजिक वातावरण प्रचंड तापले आहे. शरद पवार गटाचे आमदार रोहित पवार यांनी या घटनेचा तीव्र निषेध करत थेट मैदानावर उतरण्याचा निर्णय घेतला. त्यांनी राष्ट्रवादीच्या कार्यकर्त्यांसह पुण्यातील हडपसर परिसरातील अवैध दारू अड्ड्यांवर अचानक धडक देत तिथे तोडफोड केली. मनसे स्टाईलने केलेल्या या थेट कारवाईमुळे हडपसर भागात काही काळ प्रचंड तणावाचे वातावरण निर्माण झाले होते.
मुख्य संशयित योगेश वानखेडेला अटक; ‘असे’ चालायचे नेटवर्क
दापोडी-फुगेवाडी आणि हडपसर परिसरात गावठी आणि बंदी असलेल्या हातभट्टीच्या दारूमुळे हा भीषण अनर्थ ओढवला. याप्रकरणी राज्य उत्पादन शुल्क विभागाने मोठी कारवाई केली आहे. विषारी दारू बनवणारा मुख्य संशयित सूत्रधार योगेश वानखेडे (रा. मुंढवा, पुणे) हा घटनेनंतर स्वतःहून पोलिसांसमोर हजर झाला. राज्य उत्पादन शुल्क विभागाने त्याला ताब्यात घेऊन पुढील तपासासाठी पिंपरी-चिंचवड पोलिसांच्या स्वाधीन केले आहे. वानखेडे हा पुण्याच्या उरुळी कांचन आणि पिंपरीच्या फुगेवाडी भागात बनावट दारू तयार करायचा आणि हा जीवघेणा साठा हडपसर, काळेपड आणि पिंपरी-चिंचवडच्या विविध भागांत पुरवला जात होता. पोलिसांनी या विविध ठिकाणांवरून बनावट दारूचे कॅन जप्त केले आहेत.
रोहित पवारांचा सरकारवर घणाघात
या घटनेनंतर आमदार रोहित पवार यांनी तातडीने पुण्याच्या ससून रुग्णालयाला भेट देऊन परिस्थितीची पाहणी केली. मात्र, रुग्णालयातील अधिकाऱ्यांनी ‘गोपनीयतेचे कारण’ पुढे करत शवविच्छेदन किंवा वैद्यकीय अहवाल दाखवण्यास नकार दिला, ज्यावर आमदारांनी तीव्र संताप व्यक्त केला. “पुण्यातील ही भीषण दुर्घटना म्हणजे राज्याच्या गृह विभागाच्या भ्रष्टाचारी आणि ढिसाळ कारभाराचे जिवंत उदाहरण आहे. वारंवार तक्रारी करूनही प्रशासनाने बेकायदेशीर धंद्यांकडे डोळेझाक केली, ज्यामुळे आज 18 निष्पाप लोकांचा जीव गेला. याची नैतिक जबाबदारी स्वीकारून सरकारने महाराष्ट्राची जाहीर माफी मागितली पाहिजे,” असा घणाघाती आरोप रोहित पवारांनी केला. बहुमताच्या जोरावर सत्तेत बसलेल्या या सरकारने जनतेचा विश्वास गमावला असून, अवैध व्यवसायांना राजकीय पाठबळ मिळत असल्याचेही ते म्हणाले.
मृतांचा आकडा आणि सद्यस्थिती
या विषारी दारू प्रकरणामुळे दोन्ही शहरांतील मिळून आतापर्यंत एकूण 18 जणांचा मृत्यू झाला आहे, ज्यामुळे पीडित कुटुंबीयांवर दुःखाचा डोंगर कोसळला आहे. विषारी दारू शरीरात गेल्यामुळे अनेक बाधितांवर सध्या विविध रुग्णालयांमध्ये तातडीने उपचार सुरू असून, त्यातील काहींची परिस्थिती अजूनही कमालीची चिंताजनक आहे. दरम्यान, ससून रुग्णालयाकडून अद्याप या प्रकरणाचा अधिकृत वैद्यकीय अहवाल सार्वजनिक करण्यात आलेला नसल्याने तपास यंत्रणा पुढील कारवाईसाठी वैद्यकीय निष्कर्षांची वाट पाहत आहेत.
