Kolhapur Accident : कोल्हापूर शहरातील वर्दळीच्या शाहू मिल चौकात आज एका भीषण अपघाताने खळबळ उडाली. एका सुसाट ‘क्रेटा’ कारने दुचाकीला जोरदार धडक दिली, ज्यामध्ये दोन जणांचा दुर्दैवी मृत्यू झाला. हा अपघात इतका भीषण होता की, धडक दिल्यानंतर कार रस्त्याच्या मधोमध उलटली, तर दुचाकीचा अक्षरशः चक्काचूर झाला.
नेमकी घटना काय?
मिळालेल्या माहितीनुसार, शाहू मिल चौकातून जात असताना वेगात असलेल्या क्रेटा कारने दुचाकीला उडवले. या धडकेमुळे दुचाकीस्वार हवेत उडून रस्त्याशेजारील मोकळ्या जागेत फेकले गेले. डोक्याला आणि शरीराला गंभीर जखमा झाल्याने त्यांना तातडीने रुग्णवाहिकेमार्फत सीपीआर (CPR) रुग्णालयात दाखल करण्यात आले. मात्र, उपचारादरम्यान त्यांची प्राणज्योत मालवली.
हेही वाचा – अजित पवार विमान अपघातात नवा ट्विस्ट! लँडिंगचा निर्णय कुणाचा? तपासात धक्कादायक माहिती समोर
वाहतूक कोंडी आणि पोलिसांची धाव
अपघातानंतर कार पलटी झाल्याने आणि बघ्यांची गर्दी जमल्याने शाहू मिल चौकातील वाहतूक पूर्णपणे विस्कळीत झाली होती. घटनेची माहिती मिळताच पोलिसांनी तातडीने घटनास्थळी धाव घेतली. क्रेनच्या साहाय्याने उलटलेली कार बाजूला करण्यात आली आणि पोलिसांनी परिस्थिती नियंत्रणात आणून वाहतूक पूर्ववत केली. या अपघातामुळे परिसरात हळहळ व्यक्त केली जात असून, भरधाव वेगाने वाहन चालवणाऱ्यांवर कठोर कारवाई करण्याची मागणी नागरिकांकडून होत आहे.
