Traffic Jam : पुणे-मुंबई द्रुतगती मार्गावरील वाहतूक 33 तासांनंतर जेमतेम पूर्वपदावर येत असतानाच, आता पुणे-बेंगळुरू महामार्गावर प्रवाशांना मोठ्या त्रासाला सामोरे जावे लागत आहे. हातकणंगले तालुक्यातील घुणकी येथील ओढ्याच्या पुलावर कांद्याने भरलेला ट्रक उलटल्याने कोल्हापूरकडे जाणारी वाहतूक पूर्णपणे विस्कळीत झाली आहे.
नेमकं काय घडलं?
पुण्याहून कोल्हापूरच्या दिशेने जाणारा कांद्याचा ट्रक आज सकाळी घुणकी येथील पुलाजवळ पलटी झाला. या अपघातामुळे ट्रकमधील कांदा महामार्गावर सर्वत्र विखुरला गेल्याने रस्ता पूर्णपणे बंद झाला. परिणामी, किनी टोलनाका ते कराड दरम्यान वाहनांच्या लांबच लांब रांगा लागल्या आहेत.
अपघाताचे मुख्य कारण: ‘सिक्स लेनिंग’चे काम
या भागात सध्या कागल ते सातारा महामार्गाच्या सहा पदरीकरणाचे काम सुरू आहे. त्यामुळे घुणकी येथील ओढ्यावरील एका पुलाची वाहतूक बंद ठेवून दुसऱ्या पुलावरून दुहेरी वाहतूक वळवण्यात आली आहे.nपुलावर अचानक वळावे लागत असल्याने चालकांचा वाहनावरील ताबा सुटतो. यापूर्वीही या अरुंद वळणावर अनेक अपघात झाले असून काहींना प्राण गमवावे लागले आहेत.
सुदैवाने या घटनेत कोणतीही जीवितहानी झालेली नाही. पोलीस घटनास्थळी दाखल झाले असून, क्रेनच्या सहाय्याने ट्रक बाजूला करण्याचे आणि रस्ता मोकळा करण्याचे काम युद्धपातळीवर सुरू आहे. कोल्हापूरच्या दिशेने प्रवास करणाऱ्यांनी किनी टोलनाक्याजवळ होणारी कोंडी लक्षात घेऊन प्रवासाचे नियोजन करावे.
